من يوم سمعت خبر الارهابي اللي قبضت عليه الشرطة بمدينة الرياض وانا محتار
وش السبب اللي خلا هالشاب وأمثاله ينحرفون عن الجادة وهو من أبناء عنزه؟.
المشهور عند الناس عن عنزه انهم طيبين وحبوبين ولا لنا شر وهذا هو الواقع
والمشهور اننا نحب الوطن اكثر من غيرنا , طيب وشلون عملوه عيالنا ؟؟.
بس يوم اني فكرت لقيت ان به ناس تشتغل على شان يدهورون وطنا ويدهور ون شبابنا
واكيد انهم مقيمين بأماكن متفرقه من بلادنا وبينا على شان كذا بغيت انصح كل من له عيال ينتبه لهم قبل
تصير له نكبه والا يعملون لهم بلى والوطن عزيز والعيال غالين .
و الظاهر ان البلا كله من مكتبات هالمساجد والاستراحات والرحلات مع صقيعان ورقيعان
انتبهوا تكفون الله يرحم والديكم , واللي له اخوة صغار وهو ولي امرهم لازم يتابعهم
حتى لو هم ملتزمين ومطاوعة وش حليلهم ترو البلا مايجي الا من ورا اللي يتخفون باسم
الدين ويتحببون للناس ويتوددون للشباب ويروحون بهم عمره على حسابهم .
إلا على طاري : ( على حسابهم ) معقول واحد يدفع من ماله الخاص على شان يروح مع
مراهقين لمكه ويجلس معهم يومين أو ثلاثه هناك والأكل والإقامه على حسابه وكل شي
تمام التمام , لوجه الله ؟!! ليه مايروح ببعض هالمساكين الاجانب اللي ودهم يطبون الحرم
مرة بالسنه ؟!! ليه مايروح ببعض الكهول اللي بعمره ماطب مكه؟!! ليه الشباب الصغيرين بس ؟!!
مافكرتوا يامسلمين ؟!! ياخوفي والله باكر لاينام حديكم ويقوم ومايلقى عياله ويوم
يدري إلا هم متصلين عليه من تورابورا والا قندهار .وإلا من العراق
ياخوفي باكر لايذبحونكم عيالكم عقب مايسممون افكارهم هالكلاب وتصيرون انتم واياهم
سالفة اللي يقول : غذ جروك ياكلك .
وياخوفي باكر لايجي ولد جيرانكم يبي ياخذ بناتك سبايا لأنك كافر بنظره .
وياخوفي باكر نقوم من النوم ونلقى هالشيبان الصوامين القوامين وهالعجز المصليات الذاكرات
معلقين على عمدان الكهرب بالشوارع بحجة انهم كفار .
وياخوفي من بكرا وبعده واللي بعده ان ما انتبهتوا للعيال وحفظتوهم من الروحة مع من هب ودب
لاتقلب الديرة تورابورا ثانيه .
انتبهوا تكفون , تكفون , تكفون علشان مايصير عندنا باكر عبد العزيز و عامر وثانين .
الله يعفي عنا وعن المسلمين .
02/06/05, (02:57 PM)
تكفون ياعزوتي ياعيال وايل
العرض المتطور
