اسناد الشاعر / مذكر سعد العقيلي المطيري
يازياد دوك القـاف جــره بـمـــوال =واكـتب مع القيفان قصه طويـله
غرون ذبحني يافتى الجود بهبــال =خدن ٍ وزين ٍ والعـيون الكحـيله
والعنق عنق الريم والطــول مـيال =وليل مـشى كـن الحـزم يرتـكيله
وكن العسل ياخوك من مبسمه سال =تحتار من كثر الوصوف الجميله
لاقمت اهوجس قام يطري على البال =واسري مع الهاجوس كـنه دليـله
وآخذ واعود نوب وامشي على الجال =كني مريض العقل مدري عـقيله
وانا سندت القاف يـمـك على الفـال =حيثك من اللي يحـتمون القبـيـله
وختامها صلو عـلى سـيد الارسـال =مـحـمـد الهادي لـدرب الفـضـيـله
رد الشاعر/زياد عكروش الضويلي الشمري
يابو سعد جاني قـصيدك والامـثـال =فيه المعـاني والقـوافي جـزيـلـه
حـي القـصيد اللي به ابيـاتٍ جـزال =من شاعر ٍ ماينتـعوض بـديـلــه
أبيـات شعـر ٍ كـنـها بحـر الاهـوال =مـوجه تـزايـد والمـواني قـليـلـه
تشكي هواجيس ٍسرت داخل الحال =وتسهر ليالي واللـيـالي طـويلـه
وذيـك العـنود اللي تباهى وتخـتـال =لاناظرت لك بالعيون الظـليـلـه
تمشي دلع وليا وقـفت عـود مـيـّـال =وروحك من اسباب التجافي عليله
قـبـلك انـا طـبـيـت يـاطـيـب الـفـال =ولا جنيت من الغرام الحـصيله
اصبح مع الاحزان وامسي بغربال =والحال من سبة غـرامه نحـيله
اصيح مثل اللي بكىوسط الاطلال =والقلب كنه فوق جمر المـليـلـه
مـع كـل هـذا مانـفـع فـيه الانـضال =واعلن بعد شوف المصالح رحيله
يـاصاحـبي يامـسـنـدي روق البـال =ومن صد خـله كـود تلقى بديلـه
الـزيــن يـامـذكـر يـغـرك ويحـتـال =ويخـفي بواطن نـيته مـع دليـلـه
حَكـِّم ضـمـيرك لايـسـبب لك هـبال =وقِـله توكـل بالـدروب السهـيله
ولاتـطـيـع الـقـلـب لـو قــال مـاقـال =واللي تـغـلى إتـركـه لاتـجـيـله
دنـيـاك هــذي لـه موازيـن مـكـيـال =ولازم توازن بالمكايـيـل كـيـله
ميزان لاينـقـص ولايـزود مـكـيـال =وإن مال عدل بالمثـاقـيل مـيـله
هــذا جـوابي جـاك يـاطـيـب الفـال =فـيه القوافي والبيـوت الجـزيله
وصــلاة ربـي عـد مـاهـل هــمــال =عـلى نـبي ٍ مالحقـنـا جـمـيـلـه