حتى وردني تالي الليل جوال

[فهد السلقاوي]

حــتــى وردنـي تالـي الـليـل جــوال

وانا على شاهي وبسكـوت ديمـة

الرقم بايخ لكـن الــصــوت قــتـال

كنــه مثل صـوت المذيعـة حليمـة


قــالت مساء الخير يـا طيّـب الفـال

قـلـت ارحــبـي تــرحيبـةٍ مستديمـة

بـالـعــود والصفـري ودلـة وفنجـال

واجـبـك يا بنت الأصـول الكريمـة

وردت بضحكة ثم قالت وش الحـال؟

قلت اشهد إن الحال عقبك سقيمـة

قالت وهي تضحك بعد مثل الأطفال

وانـــا بـعـــد كــنــي بــدونـك يتيمـة

مـــن يـوم قـالـتهـا تزلزلـت زلـزال

مــن فجعتي كنـي مسـوي جريمـة

قلت ارفعي صوتك ترى مابه ارسال

كـــذاب لــكـنّ المصيبـة عظيمـة

قالت أقول اسمع ترى هرجنـا طـال

مــمكـن تصاحبنـي ترانـي وسيمـة

واسمي الحقيقي أول حروفـه الـدال

لــكـــن يسمّونـي البنـات الزعيمـة

صحيح أحب الفخفخة واعشق المال

لكـن ترانـي طــاهــرة مستقيـمـة

ما عندي امغازل ولا( لعب يهّـال)

ما عندي إلا في الشرف والحشيمـة

بس الصراحة قلبي لشوفتـك مـال

واصبحت وحدك جالسٍ في صميمه

فكّر بعقلك واترك القيـل والقـال

واحذر تطيع اهل العقـول العقيمـة

وارسل علي الحين خمسميـة ريـال

أشحن بهـا جـوال أختـي غنيمـة

أو طقم غالي فيه خاتـم وسلسـال

أروح بـه فـي عـرس ولاّ عزيمـة

قلت الحقيقة مانيب رجل اعمال

ولانـي بتاجـر والمـوارد عديـمـة

أنا الصراحة شبـه عطّـال بطّـال

وعلاقتـي بالفــقـــر جـداً حميـمـة

والراتب الله يرحم الحـال مـا زال

محـدود والمصـروف ربـي عليمـه

والــديـن بـالآلاف والبنـك شغّـال

يــاكـل فـلـوسـي بالربـا والظليمـة

والسوق طايح والغلا ضيّـق البـال

والموت والله صايـر اكبـر غنيمـة

قالت تحمّل بـس والحمـل ينشـال

خلك شديد الباس صلـب العزيمـة

ياخي تصرّف جعلك اتصيـر نشّـال

أهـــــم شــي إن النوايـا سليـمـة

لابــد تـفـهمني علـى كـل الأحـوال

ما دمت من أهل العقـول الفهيمـة

قلت إيه والله فاهم اللي على البـال

لــكــن تــرى هـذي علينـا قديمـة

يــا بـنت هـذا صايـر اليـوم مـوال

للي تبي تلعب علـى ابـن اللئيمـة

يا بـنــت ما تدرين كـم فيـه محتـال

يلعب على الحبلين وانتـي غشيمـة

يا بنت كم من جاهلة دمعها سـال

من عقب ما جات العواقب وخيمـة

والبنت يبقى عرضها بيد الانذال

والله مــا يــبـقـى لهـا أي قيـمـة

قالت تبي ولاّ فـ خـلّك علـى جـال

مهوب ناقصـني نصايـح حكيمـة

عز الله إنك للأسف منـت رجّـال

وانك قليل الذوق ما فيـك شيمـة

يا شينه اللي ما يسطّـرك بنعـال

حــتـى يـعـلمـك الغـزل يـا بهيمـة

(تفو ) عليك وصكّت الخط بالحال

مدري ( تفو ) هي مدح ولاّ شتيمـة

[شيهانه]

صح لسان

القايل


قصيدة رائعه


تسلم اخوي فهد

[سعد النفج]

الأخ فهد السلقاوي

يعطيك العافيه على النقل..

تمنيت لو كتبت اسم الشاعر ..

لأن من حقوق الشاعر كتابة اسمه مع القصيده ..

و قصائد الشعراء المنقوله لا تكتب في ( منتدى الشعراء ) بل هناك قسم خاص و هو ( المختارات الشعريه )

فلذلك سيتم نقلها الى القسم المناسب..

مع العلم بأن القصيده تحمل ابيات مكسوره ..


و شكرا لك على النقل..

[فهد الشافي]

اختيار رائع وموفق اخي فهد

فائق الود والتقدير

[فهد السلقاوي]

والله انا بحد ذاتي لا اعلم من كتبها والابيات المكسوره وينهي ياريت لو ترسلي ايها رساله خاصه

[سعد النفج]

واسمي الحقيقي أول حروفـه الـدال ( الشطر فيه زيادة حرف (ي) واسمي )

لــكـــن يسمّونـي البنـات الزعيمـة ( الشطر فيه زيادة ( الـ ) في كلمة البنات )

/
/

قلت الحقيقة مانيب رجل اعمال ( هنا كسر واضح في البيت )
/
/

أخوي فهد السلقاوي

انا ما قلت الكلام إلا لمصلحة الشعر ..

و انت من الاعضاء المميزين و غالي علينا ..

و الملاحظات هذي للتوضيح و للفايده ..

و نحن هنا اسره واحده نفيد و نستفيد..

و النقد الهادف هو المطلوب ..

و المجامله ليس لها مكان بين الأخوه ..

تقديري اخوي فهد ..

[أبو غرام]

سلمت اخ سعد

شكرا لك والاخ شكرا لك على المحاولة الطيبه