اخواني الكرام اسعد الله جميع اوقاتكم بالخير والمسرااات اما بعد
من الملاحظ في الاونه الاخيرة كثرة نسب قصة علوش بن ظويهر الغضوري العنزي الى اشخاص اخرين من القبائل الاخرى المجاورة لـ قبيلة عنزة وحفاظاً على مؤروثناء الشعبي رغبت ان اضعها بين ايديكم
قصة نقد القهوة في مجلس /محمد بن رشيد الضيغمي في قصر برزان (من قبل /علوش بن ظويهر الغضوري العنزي) .جرت هذة القصة إبان حكم إبن رشيد (الأمير محمد العبدالله الرشيد ، كان محمد العبدالله الرشيد ممن دعموا الحكم وتوسع في رقعة الأمارة ليشمل كافة نجد من شمالها لجنوبها )ويعتبر محمد العبدالله الرشيد من أقوى حكام آل الرشيد ومن أكثرهم فطنة وحنكة .وكان مجلسة يجمع شيوخ القبائل والشعراء والرجال العارفة بأمور الحياة .في أحد الأيام وعند جلوس الأمير محمد في مجلسة أمر بأن تصب القهوة لضيوفة وكما هي العادة .يقوم صبابي القهوة بالبدء بمن هم على ميمنة الأمير ، لأهميتهم وكان بالمجلس وممن جلس على الجهة اليمنى -ليس بقرب الأمير مباشرة ، ولكن ليس ببعيد عنه شخص يدعى علوش بن ظويهر الغضوري العنزي وهو شخص على دراية تامة بصنع القهوة وبطعمها ويعرف طعمها إذا داخله شيء غريب .وصل فنجان القهوة لعلوش .وعندما رشف منه رشفة تغير وجههة إذا علم بان هناك طعم غير مستساغ في القهوة .فماذا فعل ؟؟؟؟ فهق المسند الي وراه أي أبعده عن الجدار وكب الفنجان وهو يحاول أن يستتر بفعلته هذه لأنها في سلوم العرب (عرف العرب ) عيب وإهانة لصاحب المجلس .أثناء فهقته للمسند وكبته للفنجان ارآه إبن رشيد وهذا ما كان يخافه علوش .وإذا بإبن رشيد يبادر علوش بقوله . وراك كبيت الفنجان يا علوش !!!) فأجاب علوش ( والله يا طويل العمر .مالي نظر بالقهوة اليوم ) بمعنى لا أرغب شرب القهوة وهذا الجواب .مثل ما يقول المثل عذر اقبح من ذنب ألا أن الخوف دفعه ليقول مثل ذلك.فرد عليه إبن رشيد بغضب الله أكبر وشلون مالك نظر بالقهوة .وأنت لك كم يوم عندنا تشرب منه ) فطلب الأمان علوش من الأمير ليقول الحقيقة .وأعطاه إياه.فقال علوش (الحقيقة يا طويل العمر .القهوة صايدة ) بمعنى أن القهوة تحتوي على طعم غريب ون هناك شيء ما دخل فيها أثناء طبخها فإستغرب إبن رشيد كثر وقال (صايدة !!!وش صايدة ؟؟ ) فرد عليه علوش بثقة (قهوتك صايدة قعسي )والقعسي حشرة صغيرة سوداء أكبر من النملة بشوي -واذا ماهي صايدة .رقبتي لك رهينة ) بعد بجواب علوش .تحدى الأمير في أن يثبت صحة كلامة وأعطى رقبته رهنا لما يقول وإثبات لصحة كلامة .أمر إبن رشيد بأن يؤتى بالدلة وأن يؤتى بقدر لتصب فيه وأن يوضع على القدر ليف ليصفي القهوة .وفعلا صبت الدله على الليف وبعدها قام الأمير يحرك القهوة اللي تجمع على الليف بعود معه .وإذا فعلا .يجد حشرة القعسي مهترئة ويابسة كأنها ورقة من أوراق الشاي السوداء..... !!!!
هنا ألتفت إبن رشيد على علوش وقال له مستغرب (وشلون عرفت إن بالقهوة قعسي ) فجاوب علوش وهو جالس بطريقة تدل على الفخر لأثباته على صحة كلامة وفوزه بالتحدي (القهوة يا طويل العمر به طعم حموضة ) فالتفت إبن رشيد على أحد من أخوياه وسال عن علوش :كم له بالضيافة عندنا فأجابه الخوي يومين .فأمر بقوله خلوه يقعد أبا أختبره واشوف إن كان كلامه مضبوط وبشوف معرفته بالقهوة هل هي صحيحة وإلا إنها مرة وصابت وبس ..إختلى إبن رشيد بمعاونيه وخوياه يسالهم عن الأشياء اللي ممكن أن نضيفها مع القهوة ولا يبين طعمها .فاشار عليه واحد منهم أن يضيف ثمرة أو وورقة عرفج وبعضهم قال نينخة .وهلم جرا . أخذ يأمر القهوجي اللي يسوي القهوة بأن يضيف ما قالوه إلى القهوة ويبهرها ويصب ويسأل بن رشيد .( هااااا يا علوش ..القهوة به طعم شين اليوم ؟؟؟ )) أي هل بها طعم شيء ما اليوم
فيجاوب علوش ( إي نعم يا طويل العمر .به طعم عرفجة !!! ... به طعم نينخة )) يوما عن يوم يزيد إستغراب إبن رشيد ويظل يبحث عن شيء يخفيه في القهوة ولا يعلمه علوش .أتى أحد أصحاب الأمير محمد بن رشيد قادما من الحج وإلا معه مسواك جديد طري وعلم بالتحدي بين الأمير وعلوش .وأشار على بن رشيد أن يلحي جزء من قشرة المسواك ويضيفها للهيل ويبهر القهوة فيها وفعلا عملوا ذلك وأمر القهوجي بأن يصب الفنجان لعلوش وساله مرة أخرى (( هااااااا يا علوش القهوة به طعم شين اليوم ))فيجيب علوش (( إي والله يا طويل العمر .القهوة به طعم راك !!! )) شجرة الراك هي ما يؤخذ من جذورها المسواك .. آخر ما فكر به إبن رشيد أن يأمر القهوجي بأن يطبخ مع القهوة فنجان حب بن نيء أخضر غير محموس وفنجان بن محروق تماما .وقال القهوجي أطبخها وبهر وصب لعلوش ..وقال لعلوش سؤالة التقليدي (( هاااا يا علوش .. تشوف به طعم شين اليوم ؟ ))) فرد علوش (( إي والله يا طويل العمر .به طعم نيات .وطعم حرق )) أي أن القهوة بها طعم بن نيء وطعم بن محروق !!!!
هنا أيقن إبن رشيد أنه مهما حاول أن يخفي الطعم الغريب سيعرفه علوش وأيقن من درايته بالقهوة وطبخها وصنعها .. فقال له إسمع يا علوش كل ما يصير القمر مثل الباكورة بالسما ..وجهك وأشوفه .. وكل ما ينوبك من قهوة ومعاميل ... علي الين ما أموت )) يعني كل ما يكتمل القمر وصبح دائريا بدرا تعال إلينا لكي نعطيك ما يلزمك من قهوة وأدوات لصنعها وما يلزمك من حاجيات لضيافة الضيوف .. وهذا يعتبر حينئذ أكبر تكريم فالقهوة وما يلزمها عمو الضيافة ومشروب أساسي يقدم للضيوف ..حضر هذة الحادثة شاعر يسمى محمد أبا الروس الذويبي ( من قبيلة حرب ) وصاغ الأبيات التالية مسجلا تلك لقصة المشهورة
يقول فيها الذويبي الحربي :
تستاهل الكيف الحمر يا بن وايل
،،،،،،،،،،،،،،، أنت الذي تستـاهل الكيف كله
يللي نقدته وسـط ديوان حــايـل
،،،،،،،،،،،،،،، لولاك يا علوش محدن فطن له
بدلال من يـقعد صـقـا كل عايل
،،،،،،،،،،،،،،، الضـيـغمي ريف اليدين المقلة
الضيغمي مردا المـهـار الأصايل
،،،،،،،،،،،،،،، يا ما أنقطع بساقته من سجله
يا بن ظويهر مـا بها قول قــايـل
،،،،،،،،،،،،،،، تستاهل الفنجـان لا جا محله
يا نــاقـد الدلال بحكـم الدلايــل
،،،،،،،،،،،،،،، يا ريف هجن والمزاهــب مقلة
ربعك بني وايل مجاز القبـــايل
،،،،،،،،،،،،،،، أهل الجموع الراسية والمظلة
زبن الدخيل اللي توطاه طايل
،،،،،،،،،،،،،،، الجمع دونه والرمك مردف له
ورد عليه الشاعر/علوش بن ظويهر الغضوري العنزي
يابن الذويبي يارفيع الحمايل
،،،،،،،،،،،،،،، لاهنت يازين الهليب المتله
الى جاء نهارٍ فيه جاير وصايل
،،،،،،،،،،،،،،، والكل سيفه من جفيره يسله
يومٍ يخوف به رجيف الأصايل
،،،،،،،،،،،،،،، وتبينت للقوم ريبه وذله
والدم من ضرب المزاريج سايل
،،،،،،،،،،،،،،، والسيف هامات الجماجم عشله
ياحامي المظهور يوم الهوايل
،،،،،،،،،،،،،،، يامظهره من بين قومٍ مغله
يادرع من صكت عليه الضوايل
،،،،،،،،،،،،،،، يومٍ به الديان يدور بظله
حلياك حرٍ مايصيد الهزايل
،،،،،،،،،،،،،،، شره على الخرب المطرف يتله
يامرحٍ بالسوم راعي العدايل
،،،،،،،،،،،،،،، الى جن من المنكاف مثل الأهله
من لابتٍ اهل الفعول الجزايل
،،،،،،،،،،،،،،، والفعل يعرف والفعايل مدله
امل ان تحوز على رضاكم ان شاء الله
مع اجمل التحايا والاحترام للجميع
20/01/12, (02:19 PM)
ابن ظويهر ينقد القهوة في مجلس ابن رشيد
العرض المتطور
