نحتاج الى تقييم الأخوه الشعراء

[عاشق البداوه]

بسم الله الرحمن الرحيم

ياليت مارحنا هـــــــذاك المكاني
اللي به الذكرى تلوع الحشــى لـــوع

ذكرى غزالـ(ن) بالمحبه طواني
طي الرشى من فوق مدموجة النـــوع

على قليبـ(ن) يوم دور السواني
يـوم العرب تقطن على جاله جمــــوع

عد(ن) طــويل وجمته ريهجاني
ستين مــــن قاعه الى طيتـه بــــــوع

شفت الرسوم ومن خلال الثواني
و دمــوع عيني مثـــل شــلال ينبــوع

علمي بها والعمــر عشر وثماني
واليــوم انــا عـديت للثلــث بطلـــــوع

وقفــت أفكــر ليــن طيفــه لفاني
وكل الشريط اللي مضى عاد برجـــوع

الجــادل اللـــي بـــالموده برانــي
هاف الخصر وصفه من البيض دلـوع

شاحة بي الذكرى لذاك الزمــاني
ماكن فات من الزمن حسبة أسبـــــوع

يـامــا مشينـــا والحبيّب وزانــي
حـــد الجبل نسند مـــع تــلاع وفــروع

ويامــا جلسنا فــوق ذاك البياني
على المكان اللي عــن القـــاع مـرفوع

ويامـا نزلنا مــع هذاك الطمانـي
مع منخفض طلعه شجر طلـــح وقشوع

ويــاما مشيــنا بسهلةٍ سمهداني
شوف السراب اللـي بها يخيف ويروع

ويـاما عطيته بالحديث وعطـاني
نبنــي لنـــا مشــروع ونهـــد مشــروع

ويـاما عطشـت بجانبه ماسقاني
وجايع لـــو أن أرضـه بساتين و زروع

لكن عــن الأثنيـن واحـد كفانـي
شوفه يكفيني عــــن الشــــرب والجوع

كل الكلام اللي بدا من لســأنــي
على شـــــرف ماهو على شـــي ممنوع

واليوم دونه كل صعــــبٍ حداني
وحبل الوصـل من دونها صـــار مقطوع

مــدري جنوب يـم دار أقحطاني
وألا شمـــال طــريف وديـــــار ميقـــوع

فزيت وأثره حلم ليل(ن)غشاني
ونهضت ومـــن الماء تناولت قـــرطوع

ورفعـــت كفــي قلــت يامستعاني
تكتب لنــا مـــن أمــرنا خيــر وسنـوع

[محمد الجضيعي]

صح لسانك وقصيدة جميلة جدا وبدايه موفقة وان شاء الله القادم اجمل ..

[البدر]

عاشق البداوه

انت شاعر كبير وبالفطره ولاشك عندي بذلك

لا يكتب هذه الابيات من يتصنع الشعر ابدا

لا اقول الا صح لسانك الي انت ترضى وانت ظلمت هذه القصيده بوضعك لها في قسم المحاولات والمفترض تكون مثبته في قسم الشعراء ليس هنا

صح لسانك واعتبرني من المتابعين لما تكتب من هذه المشاركه فأتحفنا بجديدك مشكورا

[محمد دعسان]

كل الكلام اللي بدا من لســأنــي
على شـــــرف ماهو على شـــي ممنوع
اقول يا عاشق البداوه صح السانك ونصيحه من اخوك اكتب اسمك الحقيقي
حتى لاتضيع حقوقك وتتعرض لسرقه
تقبل مروري الله يحفظك

[عاشق البداوه]

اخي محمد الجضيعي
صح بدنك والاجمل مرورك

[عاشق البداوه]

ابدر
شكرا على الاطراء الجميل وصح بدنك
واتشرف في متابعتك مشاركاتي
كل الود

[عاشق البداوه]

صح بدنك اخي محمد دعسان شرفتني
والنصيحه وافيه
لك تحياتي