سحايـب ٍ تبـرق بالاعيـان شفنـاه=مدري مطرها سيـل ولا رشاشـي
حس الرعد خلانـي اديـر منشـاه=وابديت ذكـرالله وهيضـت جاشـي
وسميـت ٍ بمزونهـا يـوم خلـنـاه=لاشك باذرهـا حميـس الحشاشـي
مايفرح العساس لـو طـال ممشـاه=ماغير برق وغيـم بالجـو غاشـي
والبدع لي به نفس واخترت مبـداه=والخير من غر السحايـب نواشـي
ومن قال انا غلطـان ليـه اتاحـداه=وبنـاس عقـال ٍ ويظـى اخباشـي
ابازن ابيوتي علـى كيـف مابغـاه=واجاوب النشـاد حاضـر وكاشـي
واللي يبي تقسيط وش قصد معنـاه=يمكن يصير البرق لمعـة افلاشـي
دام الشبـه وارد ولبـه مــراواه=وياما اجتمع بحوار بكـره وحاشـي
ومايشرب الماء من قصر دلوه ارشاه=والحظ لامنه وقـف مـوج طاشـي
والرزق لوهو باالمشاعيـب جبنـاه=لاشك ماهـو بالزعـل والهواشـي
واللـي كتـب للعبـد لابـد يالقـاه=حتـى لوانـه نايـم ِ باالفـراشـي
ومذكور طبع الناس كـل ٍ ومجنـاه=هذا يقول الحـق وهـذا ايخاشـي
سبحان محصيها من ادنـاه لقصـاه=وكل ِ يعرّف من الزمن كم عاشـي
الواحد اللي يبـدي الخلـق وفنـاه=وخلقـه عظيـم وقدرتـه ماتناشـي
وماغيره اللي يعلـم السـر ياخفـاه=ويكشف خفى خلقه نميمـه اواشـي
وعذب المثل غيري من الناس يقواه=وهذا حسب عرفي ولابـه وقاشـي
وماهمني من قـال مبـدع ومحـلاه=وكـذا الشعـر يفـلان ولا بلاشـي
وبخص رفيقـي ماتناسيـت طريـاه=وغاد البخت يفداه مع كـل لاشـي
ماهو سواة اللي يبى الطيب وغداه=واللي تلوى ازقومهـا والخشاشـي
ون زل نايفها عن الـدرب ثـم تـاه=وتبعثرة باالحيل وراحت طشاشـي
يردها بيـت ِ علـى سـاس مبنـاه=واكيد ساسه صلب ماهـو هشاشـي
وكل ِ عطاه الله على قـد ماعطـاه=وراس الظبي معروف مابه اعراشي
لفيت باالدنيـا مـن اقصـاه لدنـاه=ولاكسبـت الا التعـب بالمماشـي
ولقيت بعـض النـاس ودك بفرقـاه=يعوض به يرجال ..كوم الخياشـي
ولقيت منهـو تنثـر السمـن يمنـاه=وليا نخيتـه قـام واقـف وشاشـي
ومعها بعد ظمن المثـل يـوم قلنـاه=حبيت اقولـه يـوم حـل النقاشـي
ياليت قلبـي كـل ماشـاف ينسـاه=ويصبر على ماجاه ويقـول ماشـي