غَافَل النسناس , شعلة في بدايات النهاية
توّها تنعس وأخذها من فم الجمر وعطاني:
الظلام , وهمهة جرح يتوقّد في حشايه
لاخطفني من يدين الليل في فمّه رماني
إن سكت.. تاهت بي الخطوة عن دروب الهداية
وإن حكى من خاطره ,, أيوووه للظلما حكاني,,!
عسعس الليل وتنفّس حِلم مجهول الحكاية
مو عشاني كل ما عسعس عليه اللليل جاني,!
له وطن .. ما يحرمه في داخل المحروم .. رايه
له من أحساسي بساتين , ومن أفكاري مباني
الوحيد اللي يقف ضدّي وأحس أنّه معايه
فيه اماني واكثر ايماني يخاف, أفقد اماني
له من الليل الهدوء وصوت (متعبّد) بــ آية
ولي من الحلم اليتيم , الحلم و اليتم وزماني
بــ ابتسامة ..! يخنق انفاسي على صدر الوصاية
(للمرايا حق وأحلام ومشاريه وأماني)
قلت والناس ؟ ,, ورضاهم ؟ عن سخطهم فيه , غاية
قال من فيهم ,, يوقفّني ,, ولا يجلس مكاني؟!
يكفي انّك شفت منهم ما عمى عين المراية
كان ودّك تبقى (الأول) لا تكون (الأولاني),!
ما على بالك يموت بــ صمت في نصف الرواية
زلة لسان و تكون انسان ,, بس انسان ثاني, !
لا تقول الناس.. لو (فيهم),! خطاك انت وخطايه
عشتهم عمرك و ابيك تعيش لو (ليلة) عشاني
ودي انزع من جناحي (ريش ليل آخِر غواية)
وآخذ من الصبح,, (ريش آخَر ) بدال اللي كساني
وآتنهّد من حطام اسلافي الرحّل .. حداية
تقطف احساس الثريّا ورد , لـ سهيل اليماني
وآتهيّا للبحر مقهور واضربه بعصايه
(ضربة الخايف) ولو قلبي من القسوة يعاني,!
ينفلق (قافين) بـ اذن اللي جبر خاطر , رضاية
وآتشظى في (شفاه) أطفال خلق الله آغاني
وان تعبت وشفت في وجهي من الغيمة , ضمايه
بـ اجمع احساسي واغنّي لك "سقا الله من سقاني"
لانّك أطهر وجه اشوفه (غــــاب) في وجه المراية
وأعظم أعظم من يوقفني,,, ولا يجلس مكاني , ,
25/04/11, (01:14 AM)
الحلم اليتيم
العرض المتطور
