يالله يـا والي على كل والــــي = اخير من يدعى لكشف الجليلـــه
الـمالك المعبود محصي الرمالــي = الـكون والدنيا وما به فهي لــــه
مـا كـان له أول وما كان تالـــي = ملكه يدبر به على ما يبي لــــه
يـقـضي ويمضي قادرٍ ما يبالــي = والـخـلق ما تفعل بلا امره فعيلـه
مـالـه شـريك جل فوق متعالــي = عـلمه أحاط بدقها والجليـــــه
أشـهـد فلا غيره آله ولا لــــي = ربٍ سـواه أخشاه وأرجي النيلــه
يـاواحـدٍ فوق السموات عالـــي = مـن سطوته كل الخلايق ذليلـــه
يـا فـارج الشدة بضيق الحوالـي = افـرج لـعبدك يامنجي خليلــــه
وانـظـر بـعينك يا آلهي الحالـي = فـردٍ غـريبٍ والمصاغي قليلـــه
وحـيد مالي غير ظلك أظلالـــي = ذلـيـل مالي غير عزك وسيلـــه
يـاراحم ارحم شيبتي وانخذالـــي = يـاجابر اجبر عثرتي والفشيلـــه
والـطف وناظر ياالولي في سوالـي = لا تـواخـذان فيما مضى من فعيلـه
لا إخـوان لا عـمان لا من خوالـي = ولا مـن صديقٍ بالوزى نشتكي لـه
لـو كـان ما يجلي سوى الله جالـي = مـاشـفت عبدٍ هرجته لي جميلــه
تـقـطعت وذم العرى والمدالـــي = مـن جـملة الخلان والمستخيلــه
قـضـيـت من المخلوق ماحدٍ بقالي = إلا أنـت يـاللي ما يخلي عميلــه
عـادوني كل الناس شرق وشمالـي = ولا بـقـى غيرك ذراً نلتجي لــه
شـافـونـي مذلولٍ وحيدٍ وخالــي = والا لـي مـن الفزعات مومي شليله
وأنـا بـعـون الله امتانٍ احبالــي = مـتـجودٍ بحبال منشي المخيلـــه
لـو كان كلٍ له صديقٍ أموالـــي = أخـوال واقـرابٍ ولحدٍ قبيلــــه
أنـا لي اللي زابنه ما يسالــــي = جـزل الـعطا مبري الجسوم العليله
إلـى دعـوا حيانهم فز بالــــي = رفـعـت طرفي له وقمت أشتكي له
والـلي تنادوا بينهم للنوالـــــي = نـاديـت بـإسمك يامنشي المخيلـه
مـن لاذ بك ما صار بالضيق تالـي = يـصـيـر الأول لو اعظامه هزيله
أنـا دخيلك يا عزيز الجلالــــي = حـاشـا كـرم جودك يضيع عميلـه
تـبريت من غيرك بحالي ومالــي = وزبـنـت أنا بحماك عن كل ميلـه
مـن شر خلقك لايذٍ بك ومالـــي = غـيـرك مـلاذٍ شامخٍ ينعني لــه
يـارب مالي غير جدواك وإلـــي = وإن كـان خليتن فلا لي عقيلـــه
ياعالمٍ با المخطيه والعدالـــــي = تـشوف مالي غير عدلك وسيلـــه
فـلا تـؤاخذني بماضي أفعالـــي = يـا ساتر العورات مضفي الجميلـه
لـو كان ذنبي راجحٍ بالجبالــــي = عـفوك عظيم ليس ذنبي عديلـــه
أطـلبك تقبل توبتي عن خمالـــي = وأطـلبك عني كل كربٍ تزيلـــه
وأطلبك تغفر لي وتصلح أعمالــي = يـا مزبن الخايف إلى باد حَيلـــه
مـولاي لا ملجأ ولا ملتجأ لــــي = إلا أنـت ياللي ما يضيع نزيلـــه
يـا فزعة المضيوم منشي الخيالــي = ا فـارج الشدات لوهي ثقيلــــه
أفـرج لمن بالحبس دونه أرجالــي = ابـواب واقفال حصونٍ ثقيلــــه
فـي وسط دبابٍ وحيدٍ الحالــــي = أظـلـم ولا أدري وش نهاره وليلـه
مـتروك مالي من يرد المقالـــي = لا أحـد يبي قولي ولا أحد يشيلــه
ولا أحـد غيرك عليه اتكالــــي = إلا أنـت يامنجي دريك الدبيلـــه
مـا دام تنظرني وتسمع مقالـــي = مـا خـاب عبدٍ يدري أنك وكيلــه
يـا سامعٍ بالليل حس النمالــــي = وصـوت يونس في البحور الطويله
دعـاء وضرب الموج مثل الجبالـي = فـوقـه أجيبت دعوته وتهليلـــه
يـا مصرف الأيام هي والليالـــي = فـي قـولته كن يجري القلم بتعديله
أدعـوك بأسماك العظام الجزالــي = وبـحـق مـا خصت لك من فضيله
وبـحـق عظمة قدرتك والجلالــي = وبـحـق نورك والأفعال الجميلــه
وبحق ما نزلت أول وتالـــــي = تـجـيـرني من شر خلقك طويلـه
وتزيل كرباتٍ علينا اثقالـــــي = تـغـطلست مالي سوى الله دليلــه
أمـن على قلبٍ يجول اجتوالـــي = يـامـسـكن الروعات سكن جفيلـه
اسرع علينا يا قريب النوالــــي = لا تـجـعل الشده علينا طويلـــه
يا فارج الكربه بضيق الحوالـــي = أومـر الـعبدك بالفرج واتعجيلــه
واجل الأمور المعظله والجلالـــي = عـن كـل عـبدٍ مسلمٍ يندعي لــه
صلاة ربي عد رمل السهالــــي = عـلـى نبيٍ وضح الله دليلــــه
صفوة قريش اللي مشى بالعدالـــي = نـبـينا المعصوم عن كل ميلـــه
تمت وفرجها عزيز الجلالـــــي = فـرحـت بالطارش وقمت ادعي له
28/11/07, (05:56 PM)
قصيدة التوبه للشاعر ::محمد العوني::
العرض المتطور
