الحر حرن والحمامه حمامه

[ابو ياسر الهبداني]

السلام عليكم ورحمه الله وبركاته

قصيده تعبر عن نفسها :

الخبث يابن آدم له سنين موجود = من طلعت الدنيا ليوم القيامه
ماهي غريبه فعلت الخبث ياسعود = لو هو فعلها ماعليه الملامه
بعض البشر ياسعود عقاربن سود = تقرص ولاكن قرصته في ضلامه
الراس نازل والذنب فوق مشدود = والسم على اطراف ذيله علامه
هذا يابو منسي مايحتاج بارود = زنوبةٍ تاطاه تخلف عضامه
وبعض البشر دابٍ على راس جلمود = والبعض اللآخر تحت ضل العدامه
من هذي الانواع حذراك بالزود = من ذبحها يحتاج فن وقرامه
وبعض البشر حصني ولا بقربها فود = خبيث راي ويدّعي بالفهامه
وبعض البشر طيرن على راس عامود = الحر حرن والحمامه حمامه
وياسعود ترى بالناس اذياب وفهود = ولاعمهم تبقى الشهامه شهامه
الذيب مايحتاج في فعله اشهود = ولا الرخامه طول عمره رخامه
واحذر تماشيلك خبيثٍ وممرود = لاجات حزات الشدايد نعامه
واحذر تبوح بسرك انسان مقرود = تعيش مدى الايام منها ندامه
وحذر من النقصان واحذر من الزود = واحذر من الجاهل وحذرى الغشامه
واحذر تسير وآخر الخط مسدود = تاخذ على سود الليالي غرامه
واحذر تبيت ابقاع لاصار به دود = ابعد ترى فرقى الودايع سلامه

[مسعد النافل]

الاخ العزيزوالشاعر ابو ياسر الهبداني
الله عليك بهذا الكم من الشعر وتجارب الحياه من خلال هذا النص الشامخ
الراس نازل والذنب فوق مشدود والسم على اطراف ذيله علامه
وصف من النوع الاول من الطراز الاول وما احد سبقك على هذا البيت
اخيراً
تقبل تحياتي من الاعماق اخوك مسعد

[صالح الجطيلي]

ابو ياسر الهبداني

صح لسانك

الله لا يهينك على ها الحكم يارجل

دمت بود

[سعد النفج]

ابو ياسر الهبداني

صح لسانك

شاعر حكيم , تفننت بالكلمه, اجدت الوصل لما تريد.


شاعر لا تحتاج الى شهاده بظل هذه الابداعات

يعطيك الف عافيه

اخوك / سعد النفج

[صالح التويجري]

ابو ياسر





صـــــــــــح لـــــــــــسانك

[تركي صالح]

ابو ياسر الهبداني

حكم تناثرت من هذه القصيده الجميله

صغتها بمعرفه وأطلاع ومعاصره

ليكون نتاجها هذه الرائعه

صح لسانك وسلم فكرك

ودمت بكل خير وعافيه

[ماجد الغانم]

الأخ العزيز

والشاعر ...

ابو ياسر الهيداني


صح لسانك ولاهنت ...

قصيدة في قمة الأبدااع ومليئة بالحكم

بيض الله وجهك...

دمت بكل خير

ودام هذا التميز والأبدااع
.......
.
.
تقبل تحياااتي