ياشينها لقيل ضفوا المعاميل.......

[احمد العريفي]

ياشينها لاقيل ضفوا المعـامــــيــــل=والفرش طـوّوها وطوّوا الزوالـي
وهدوا الخيام وصفطوهن معـاديـل=وضفوا بقايا عـفشكم والتوالـــــي
ومـدوا قبل لاينتشر اسود الليــــــل=الليل اعمى والخبل مايبـالــــــــــي
وترفقوا بالخط مامن معاجـيــــــــل=ما بالبلد غير النكـد والخمالـــــــي
وتوادعـوا عسى اللقا بالمقابـيـــــل=عسى نتلاقى بمقبلات اللـيالـــــــي
ويازينها لاقيل شبوا الغـرامـيــــــــل=واركـوا على النيران صفر الدلالي
وابنوا خيامٍ مثل روس المصاطـيـل=منها تصاغر شامخات العوالــــــي
وتليموا طاب السهر والتعـاليـــــــل=وهاتوا العلوم الطيبات الجـزالــــي
وصَفوا القلوب امن الغثا والغرابيل=وتمتعوا بالبر والعمر بالـــــــــــــي
في راس طعسٍ حاير ابجاله السيل=بارضٍ خلا باقصى النفود الشمالي
ماداج فيها راعي الفطر الحـيــــــل=ولا رعووها مالكين الحلالــــــــــي
صورت حال مولع البر بالحـيــــــل=لقيل ضفوا العفش عقب الزوالـــي

احمد بن عبدالرحمن العريفي
(نديم المجره)

[حشر الغضيان]

صح لسانك وعلا شانك

على القصيده الجزله

ودي وتقديري لك

[بنت الكحيلا]

صح لسانك اخوي احمد العريفي

والله يعطيك العافية على النص الجميل والرائع

كتبت وابدعت ولا يستغرب الإبداع من اهله

لك لك الشكر

[طالب الونيس]

صح لسانك مابالمدن الا الازعاج ولاكن انه بماعمت به البلوا شئنا ام ابينا
مشكور على النص الجزل

[جايز المفوز]

كما عوتنا على جزالة الشعر هاذى انت

صح السانك مدد بلاعدد

تحيه لك من القلب

[سالم العنزي]

احمد العريفي .. يعود بعد غياب ويحضر بالجزل كالعاده .


صح لسانك يا احمد وتقبل اعجابي الشديد وان شاء الله يجي المطر وتربع الديره ويزين البر احسن واحسن

[صالح الأسود الجعفري]

احمد العريفي

صح السانك نص رائع
دمت بخير