[نواف هلال]

صدر القصايد يشتكـي كتـم الأنفـاس=وعيـون حرفـي مـا تقـدّر مباتـي
والبـال يسريبـه ثمانيـن هـوجـاس=والروح عيّـت تقبـل جـروح ذاتـي
عزمي يقـوم وتطرحـه قـوّة اليـاس=والصبر ينفـذ مـن محاسـن صفاتـي
والوضع سيّء تحت لوعات الأتعـاس=وأنـا بديـت أجهـل معالـم حياتـي
من وقتي اللّـي للشّقـا دق الأجـراس=وقـت ٍ يضيـع ولا يجمّـع شتـاتـي
وقت ٍ به الدنيـا علـى غيـر مقيـاس=تمشي عبـث عكـس إتجـاه أمنياتـي
دنيا تماشت مـع عديميـن الإحسـاس=تاخـذ مـن أيّامـي إذا قلـت هاتـي
إنْ شفتهـا متعوكسـه قلـت لا بـاس=تزيـن ... وإلا يكـتـب الله وفـاتـي
بغيت أكسّـر بالذهـب قـوّة المـاس=حاولت أضم التضحيّـه مـن سماتـي
لين أمنياتـي هدّهـا حيـل الإفَـلاس=تمـوت فينـي قبـل ساعـة ممـاتـي
شربت سم الهـم كـاس ٍ ورى كـاس=كنّـي عمـى والهـم ضيّـع عصاتـي
كنّي تحت ضربات من في يـدَه فـاس=أروغ عنها ... بـس صعبـه نجاتـي
لكن قبـل لا يوصـل الفـاس للـراس=ناديت حرفـي لأجـل يلبـس عباتـي
يا حرف ... قم وقّف على راس نبراس=وإكتـب بـدمْ المـفـرده ذكريـاتـي
ما ينبني مجـد ٍ عظيـم ٍ بـلا سَـاس=ولا كل مـن سـوّى يسـوّي سواتـي
ولا بالردى لأهـل الرديّـات نومـاس=ما بالردى غيـر الـردى يـا غناتـي
والله ... ما ينسى خويّـه ولَـد نـاس=ولا كل من وصيّـت يمسـك وصاتـي
ولو أضمن إنّي عشرتي عشرة أنجاس=حرام ... ما افارق مجالـس خواتـي