الصاحب اللي يثير الغرب تشريقه
والشمس لو هي تعذر .. عذرها واهي
يطري غصيبه على القلب وطواريقه
وان قال وين القصيده قلت له .. كاهي
هو ملهم الفكر هو كيفه وترويقه
صار لجنون القصيد .. الامر الناهي
اموت في غيرته واحب تدقيقه
واشاغب شوي لاحسيت به .. لاهي
واسكت وكل الكلام احيان مااطيقه
لامن تقاسم معاي ( بياله الشاهي )
ياطب قلب العنا .. لا ياعسل ريقه
ماظني الحال تبقى لك على ماهي
يا اقرب من القرب بين الصدر والضيقه
يا ابعد من الضحك يوم اقفى عن شفاهي
دوك القصيده .. وقلبـي .. مع طواريقه
وان كان قصدك تباهي .. روحي اتباهي