أبي امسح دمعة الواقع وابي اطلب رحمة الرحمان=لأني شايفٍ وضع الزمان بحال يرثاله
ترى كل البشر هذي أساساً ترجع لإنسان=خلقه الله ومن ضلعه خلقله أم لعياله
بني وايل , طنا شمر , ولاني ناسي الظفران=وقبيلة حرب مع يام وبقى للخيل خياله
مع مطير وقحاطين ودواسر وأذكر العتبان =وباقي بالبشر خير وبقى للخير تمثاله
بني لام , وبني خالد , وابي ارسل ود للعجمان=وأحيي كل من تطري تحياتي عى باله
مع سهول وبني غامد وابيها توصل السبعان=وأهنّي نفسي بحرفي وحرفي واهنيّاله
قبايل صعب نحصيها ولكن كلنّا إخوان=بنا زين وبنا شين وبنا اللي حالته حاله
وأنا ما اقول بالعالم قصور وربعي الشجعان=ولكن كلٍ يغنّي على كيفه بمواله
أنا ربعي هل الجدعا نشاما داخل الميدان=ليَامن قام ابن معجل شقى وقته تصدّاله
مروراً بالمصاليخ ووصولاً لي بني شيبان=لمحت المجد في بيتٍ كبير وطالت حباله
ابي اذكرلك هَل العليا ودور اورنس ابن شعلان=شجاعٍ دوّن التاريخ حرف المجد لأفعاله
وابي اذكر دور أبناء العمومه واذكر الفدعان=عشا ابن مهيد يا ربعي من اللّي غاب عن باله
ولاني ناسي إبن غبين والذيب العرَج ذيبان=مثل صيته مثل نجمٍ بعيد ولا وصلناله
وابي انظر لأقرب سبيعي وابي اذكر شيخهم راكان=ابن مرشد سند منهو نخاه ليا تنخاله
وبقى للجعفري شان وتوارث بالمهابه شان=توارث هيبة عقاب بنظر من ياقف قباله
وابن هذّال وأفعال الصقور وفزعة الحبلان=وطيب سويلمي لامن لفى ضيف وتهيّاله
ومهابة مطرفي وإلا شموخٍ عانق مضيّان=وفزعة دهمشي وإلا بجيدي والوفا فاله
وأبي اذكر ساجر ونعم المراجل وأذكر الشملان=وابي أوفي بس يا ثقل الوفا للوقت ورجاله
والحسَنه وإبن ملحم وابي ارفع للوفا عنوان=وأغربل حرفي الصادق وابي احكِم صح غرباله
وأليدا وأذكر الطيّار وعمدة ربعنا قيران=وأحيي باقي ربوعي أخاف نطوّل القاله
وأبي أضرب بس ابي أخطيها مع إنّي شايف النيشان=لأن السالفه تذبح كريمٍ مد فنجاله
تأكّد ما يسوّيها أصيل ولابته ويلان=ولك الله ما رضا فيها كريمٍ ميّل عقاله
أبي انهج نهج جدّاني وابي ادمح زلّة الغلطان=إذا ثلثين مولود المعاني يرجع لخاله
يكفّي ثلث بالمعنى يعوّض باقي النقصان=مع إنّي شايفٍ وقتي غدى في حال يرثاله