[محمد بن موسى]

ماكل مايطرى على البال نقضيه=ولا كل ملبوسً كسى الجسم لايق
وماكل حاضر حافظً حق ماضية=ولاكل من عاهد يصون الوثايق
وماكل مخطى قادر آنك تقاضيه=ولا كل صاحب حق يثبت حقايق
لو من غدى ..ليل بخلا.. دل اراضيه=ماشفت بين الناس غادى وضايق
ولو من شكى همه لقى حل يرضيه=واللى خلقنى ما اشتكى للخلايق
لا صار ماللجرح طبً يداويه=الله كريم يزيل ماكان عايق
وش لى بزود الهرج وش لى بفاضيه=الصمت يستر من بجوفه حرايق
ياقدرة الله كيف من كنت مغليه=يقفى وآنا ماكنت كاذب وبايق
أن كان ماجانى ولا قال وش فيه=وشلون ابصبر كان باقى لحايق
ياعين لدّى بالنظر لا تغضيه=جودى على بنظرتك لو دقايق
جسر الوصل ما بيننا لا تقضيه=ماعاد لى قلبً على الصد طايق
منك الزعل لو طال مجبور اراضيه=وش عاد لو ما اخطيت ولا كنت رايق