اليكم مع التحيه
يالذيب برق في سما خاطري لاح =تخاطفه بين المزون المراويح
سيله على عوج المحاني أليا طاح=ينحت ضلوعه لين عادت صلافيح
قلت ارفقي يامزنة الشعر بالراح=روفي بحالي ياجروح المجاريح
الشعر بحر يعشقه كل سباح=وفي غبته ضاعت فنون السوابيح
وللحظ في دولاب الايام مفتاح=في عالم كثرة عليه المفاتيح
وانا لقيت العلم في بيت الأشباح =اللي على جاله تحوم النوابيح
حديقته فيها ثمانين تمساح=وباطرافها سور وحديد ومراجيح
فيها ثمر حنضل على غصن تفاح=وقيصومها عرفج ونعناعها شيح
في ركنها الايسر زغاريد وصياح=وفي ركنها الايمن تلاوه وتسبيح
وعود حياته كلها كفاح بكفاح=يقوم من صكات الايام ويطيح
له مع هل الفتنه مشاوير ونطاح=واشوفها كثرت عليه النواطيح
ماهو بجايز لي ولاني بمرتاح =والوضع يبغى يافتى الجود تصحيح
ان جيت ابفزع دونه سيوف ورماح=دونه عبيد بالملاقى ذوابيح
وان جيت ابقفي هاجس المرجله صاح=وانا ولد ذيك الوجيه المفاليح
قلت اكتب الكلمه على خف وجناح=يمكن مع الايام تسري به الريح
خبري بكم يالذيب صاحي ولماح=وخبري ببعض الناس يامسندي ميح
محمد لطيف العنزي