رجعنا
هذه لـــ مشعان بن هذال شيخ مشايخ عنزه
وتسمى ويقال لها شيخة القصايد
يالله يامدير الهبايـب والادوار @@ شانك عسى تصريف شانك لنا خيـر
يالله ياعالم خفيات الأســــــرار @@ يامعتنــي بالخلق والي المقاديـر
قلته ونوم العين عن جفنها طار @@ والقلب كنه فوق حامي المجاميـر
جانـا الخبر يالابتي ولّية الــدار @@ سكانها الأجناب هم والبقاقيـــــر
من عقب ما كنا بها مثل الاسـوار @@ نامر وننهي نحمـي الجار ونجير
من عقب ماكنا هنيا كما الـنـــار @@ نقطع بها شر وناصل بها خيــــــر
حنا الذي ترجع لنا كل الأشــــوار @@ لا صار بالقالات شوار وامـشيـــــر
حامينها في لابة تسقي الامـــــرار @@ عدوهم ما يحتسب للمخاسيـر
لابد ما ناتي لابانــــــــات زوار @@ باسلاف عجلات تعدى المظاهيــــــر
يهوّمن هومات بعيدات وعســــار @@ وكم ذيرن من غافل مابعد ذيـــــر
كم فاجن العدوان غرات وجهـــار @@ الى انتون كم يسبقن من معاييـر
ظعاينن حطن ملكهن بسنجــــــــار @@ وبنن على الخابور زين الدواويــر
وتواهلن الزور حصن لهن كــــــار @@ ومن البطين الى الرها له معابيـر
وكنن مع الحاوي وداجن بالامصـــار @@ وجابن خفارتهن بفكر وتدبيــــــر
وحطن على السلمان طيحات الامطار@@وصارت لهن لينةوخضرا مصادير
وأبا ذراع أضحى مقيم على الـــدر @@ وشالن حلال المحمرة والمسامير
ومالن على رجم الهيازع وسنــّار @@ وجابن حلال المحمره من ورا النيـر
نامر وننهي مانداري بـــها ادوار @@ ونهدي العاصي بخسر ومخاسيــــــر
وراجن على الشنبل وداسن الأخطار@@وهدن بهاالعاصي بيسر وتيسير
ثم انتحن مع كفة الشط عــــبــار @@ وهاجن وماجن فوق روس العناقير
واقفن وكالن من شثاثا بالسعـار @@ وحطن لملموم المسمى مسامير
واقطعن ينون الخطايا والاقفــــار @@ وكم طيرن جول الحبارى مخاميــــر
وخلن فوق الشبك عج الرمك طـار @@ و حلو هاك اليوم خز المعاشيــر
واركن على ورد الدجاني لهب نــار @@ وغدو بها الويلان مثل المداويـــر
وشدن وحطن الثمامي بالايسار @@ وخلن على المطران مثل المعاصيـر
سارن بناالزرفات باقبال وادبــار @@ من غوطة الفيحا الى غسلة الديــر
في كل درب بالمناعير عبـــــــار @@ ياما تجوب خيولنا من مشاويـــــر
نروم من زين المنازل ونختـــــار @@ ونستارد الخوه بحدب البواتــــير
لياما نخونا اللي على نجد حضــار @@ وجانا كتاب من زبن المقاصيـــــر
ماجد بن عريعر حر الاوكــــــــار @@ يقول وليت داركم يالمناعيــــــر
الشيخ اللي حيف على البيض بالغار @@ يقول حل بداركم حرب ومطيــر
وجيناه مثل السيل طمام الاوعـــار @@ لياما غدت عنها البوادي شعاثير
أولاد عم ولابنا قول شبشــــــــار @@ وشيخ لنا عنده جلال وتقديـــــــر
أولاد عم وما حذانا لهم جــــــار @@ حنا عليهم نحمي الجار ونجيـــــر
حنا شبات الحرب وان شبت النـــار @@ وتوايقت بين الحنايا الغناديـــر
حنا بني وايل بعيدين الاذكـــــار @@ اليا تناخو بالجموع المشـــاهـير
حنا هل الجمع المسمى الياسار @@ بمركاضنا يشبع به الذيب والطيــر
وين انت ياللي تايـه منك الابصـار @@ جيناك حوله من شثاثا وابا القـير
هـج (الدويش)و مالقينــاه بالدار @@ زبن على الحـره وذيـك الشناخـيـر
باغي عليهم صـايرن مثل ماصــــار @@ ذبح الشفـايا واغتنـام الخواويـر
كســيرة ماقط ذكـرت بالاذكـــــار @@ فيهـا القلايـع مثل روس الخنازيـر
صحنا عليهم صيحة باللقا الحـــار @@ حتى جبرنـاهم عن الدار تجبــــير
لولا شفــاتي فيـك يانجد ماأحتـار @@ فكـري ولا كثرت علي التفاكـــيــر
ولولا شفــاتي فيــك ماجيت مــرار @@ نادى نذيرات الهواجيــس ونديـــر
وندير حيــلات بالاريـــا وتبصــار @@ وارجي من الباري عساها مسافيـــر
نجد جـفتنا وكــل دار لنـــا دار @@ ماهي معـافه مـير جوع ومداهـيــر
قطعـاننــا ترعى زماليــق نــوار @@ لياما غدى فـوق الاباهر قناطـيــر
مـابين مسنــاد ومــا بين محـدار @@ يامـا قطعنــا بدربن من مشاويــر
ياما ركــبنا بالسرى قب الامهــار @@ وبعيرات الأنضــا كنهن السنانيــر
نعتاض عن دار عليها الدهر جـــار @@ ديد العسل فيها تعيش المفاقـير
مثل المسوح اللي ترزم على حــوار @@ دار مريه بالشتــا تسمن الضير
دار لها بالقيــظ غدران وانــهار @@ والتمّـن المجروش ملي الجواخـيــر
وصلاة ربي عد مابالسـما طــار @@ طيرٍ وعداد ماوردن ظمايـا على بير
على الرسول المصطفى سيد الأبـرار@@ نور العباد اللي يشيع التباشير
دمتم بوود