جيتك وله
جيتك وله كلي جروح وغرابيل
........وانته عليك دواي من جرح مفضوح
جيتك مع أحزاني أجر المواويل
........ ظميان أبي شربة غلا تسقي الروح
تكفى ترى تكفى تهز الرياجيل
........ كم قالها قبلي من الوقت مجروح
معقول ماهزّتك يانافل الجيل
........ معقول تتركني مع الهم والنوح
معقول تحرمني صدوق المخاييل
........وابقى كذا غرقان بالجرح مطروح
شفني يباس احتاج لك وانته السيل
........ تعال واغرقني صحاصيح وسفوح
*خل الغرام يفوح بالشوق والهيل
........ وقوس الربابه يحضن الشن مشفوح
خل الغضى يحكي لجمره تعاليل
........ خل الحمام يطير ويروح ويروح
يروح لين يعانق الجدي وسهيل
........ يزرع ورود هناك وبعطرح تفوح
خل الجديل يلفّني كنه الليل
........ ودهدهني وقل لي سواليف ومزوح
تعبت وانا اشيل واحط واشيل
........ همّ(ن) مخلي حاجر القلب مقروح
واليوم يادجلة خفوقي مع النيل
........أبني عليك آمال واشيّد صروح
ماودي اصحى واكتشف كذبة ابريل
........ واضيع في حزني محطم ومذبوح
خلاص ماعندي زياده وتفصيل
........يكفي واظن الوضع واضح ومشروح
أما تعال وأحيني بالمقابيل
........والا توكّل رح مجمّل ومسموح
مما راق لي