تعالو نعيش أيام زمان ولو دقائق
كيف الحال يا أعضاء ويا عضوات
اليوم جبنا لكم موضوع جديد وأتمنى انه يحوز على رضاكم وإعجابكم وحبينا نختبر
ثقافتكم ومعلوماتكم في التراث الشعبي اللي هو تراث أبائنا وأجدادنا ..
المسابقة أو المشاركة في الموضوع هو عبارة عن كلمات راح اطرحها لكم هالكلمات
عبارة عن أشياء وأغراض كانو يستخدمونها في قديم الزمان مثل مسميات الأواني أو
الآلات الزراعية أو أي شي كانو يستخدمونه سواء من كلمات أو أماكن يعني ( راح
ننبش الماضي ونطلع كلام أبائنا وأجدادنا ) بس بالامانه اللي يشارك في الموضوع لا
يسأل أمه ولا جدته عن المسميات يعني نبغا نشوف مدى أصالتكم ومدى تمسككم
بعبق الماضي ( يمديكم على عبق الماضي <<<< عنده مواهب بس محد اكتشفها )
يلا عاد خلونا نشوف طشارتكم ومدى تمسككم بتراث الآباء ولو شفت منكم تفاعل
راح انزل كل أسبوع كلمات جديدة وانتم تكتشفون وش هالكلمات وش تعني , عاد
الفائز اللي يجاوب على جميع المسميات له جائزة .
الجائزة الأولى والكبرى / حلاو بقر
الجائزة الثانية / قريض
الجائزة الثالثة / أقط ( مضير )
كذلك بما انو فيه جوائز للفائز فيه عقاب للخاسر الدجه اللي ما يعرف شي عن تراث ابائه واجداده ..
العقاب الأول / يروي من القليب ويسقي جميع الأعضاء والعضوات ( حطو في بالكم انكم بتروون في القايله )
العقاب الثاني / يلقح ويحش في نخل أبوه ( حطو في بالكم انه في القايله بعد )
العقاب الثالث / يسرح بالغنم ( كذلك في القايله )
<<<<<<<< ما عنده يمه ارحميني في سبيل المحافظة على الموروث الشعبي في ظل التطور والعولمة .
المسميات الثانيه طول الله عماركم :
المحاله / ......................................
الرشا / ........................................
المدخله, الربعيه / ....................................
الصفه / ............................................
الغروب / .............................................
المخراز / ...............................................
اتمني للاخوه والاخوات اللي ما حالفه الحظ المره اللي فاتت يحالفهم هالمره ويحاولون
ياخذون الحلاو من ( احساس قلم وابو فهد )
كذلك نبارك (لاختنا احساس قلم واخونا محمد موسي ) على فوزهم في الجوله الاولى
<<<<<<<<<< متأثر بمسابقات حروف
نتمني له المزيد من النجاح والتألق وعقبال الجولات الاخرى
أتمنى لكم قضاء أجمل وأمتع الأوقات في ظل إحياء الموروث الشعبي .