[حاسب الرويلي]

السلام عليكم ورحمة الله وبركاته

لقلوبكم هذه المتواضعه

البارحه جمر السهر والتباريح=شبيّته بعود الصبر والصبابه
والحزن في صدري يبي يقوم ويطيح=من يوم ما قفّل على الهم بابه
عجزت لا القى له بوقتي مفاتيح=وانا العنا ما بين ضرسه ونابه
حدّت ظروف الوقت ممشى الطحاطيح=حدّت سنين الجوع عدي الذيابه
حتى عوت في عاليات الصلافيح=يسمع عواها منه/فيه المهابه
وان هرولت تطوي القفار الصحاصيح=تلقى عشاها أو رمتها حرابه
وانا ولو ماني بعيد المشاويح=ما كان زادتني الليالي صلابه
ركاب فكري ورّدت صافي السيح=لين ارتوت ولا تكدّر شرابه
وغنيّت من ضلعٍ قصيرٍ بي يصيح=وحز المّولع حز قوس الربابه
ذنب الخطا ما يغفره كل تصحيح=والاسئله تاهت فـ بحر الاجابه
يا من يجيب العلم عن مهرة الريح=بنت الحصان الي عزيزٍ جنابه
اقفت تقفّاي السحاب المراويح=وانا المحل يسبل علّيه ثيابه
علّقت فـ عيون الليالي مصابيح=وشرّعت بيبان السهر للكتابه
ارسم على صدر الورق وجد وآزيح=ستاير الذكرى لوقتٍ هنا به
واطلقت من سود المحاجر مسافيح=اصدق مشاعر فالرجل من عذابه
والصدق ما يبري جروح المجاريح=لكن صدوق الحب جرحه سما به
الغيم لو كثروا عليه المشافيح=ما نقصّوا أو زودوّا به سحابه
كل الموادع تقتفي به بـ تلويح=الا أنا ودّع حبيب و قفا به