البارحه ضاق الصدر حزت النوم=والعين جاها مايطيّر منامه
وكل السبب علمٍ لفاني ضحى اليوم=قالوا توفى شيخ كل الجهامه
وهام الفكر من فوق ظلعان وحزوم=حاير لوحدي فوق راس العدامه
ياكثر ماماتوا زحازيح بالقوم=وياكثر ماهلت دموع الندامه
بس سيدي قدره عن الغير معلوم=بقلوبنا حي ويزيد احترامه
ياسيدي مرحوم مرحوم مرحوم=مرحوم يارمز الوفا والشهامه
مرحوم ياشيخٍ محنك وزيزوم=ياللي غديت بجبهة العز شامه
ياجابر الاحمد عن الشين معصوم=مثلك باعلى المجد دايم مقامه
كان المراجل طيب واخلاق وسلوم=تاقف وتضربلك تحية سلامه
وكان المراجل صيت وافعال وعلوم=ماهي غريبه في يدينك زمامه
تقصر عن افعالك زحازيح وقروم=يامن رقى بالمجد قمة سنامه
بدسمان محشومٍ وبالقبر محشوم=بقلوب شعبك نلت اعلى وسامه
الحزن كنه بالسما فوق مرسوم=وسبع الاراضي تهل دمع اليتامه
حتى الجبل من غيبتك صار مكلوم=وحف الشجر من نوح ورق الحمامه
ماتبات عينه دام بالشعب مظلوم=واحدٍ يشوف بوسط عينه غمامه
كل العرب تبكي مع الفرس والروم=وكل دعاله يرحم الله عظامه
مافيه شخص يزيد عن موعده يوم=اللي بغاه الله يصير بتمامه
كلٍ يبي يحيا من العمر مقسوم=واللي كتبه الرب مابه عتامه
حق علينا الموت فرضٍ ومحتوم=وكل يجيه الموت لحظة ختامه
ياسيدي ليتك من الموت محروم=وماتت بدالك عشرة الاف هامه
مشعل الفدغوش
أمـــــير القــــــوافي