السلام عليكم ورحمة الله وبركاته
اعضاء ومشرفي هذا الصرح الشامخ ويلان
نص ترددت كثيراً في طرحه ليس لشي الا لأنه اثقل كاهلي ودامع عيني اثناء قراءته وكتابته
وهو بأبنتي المرحومه ( أسيل ) رحمها الله بواسع رحمته
فأتمنى ان تقبلوه كما هو ..
ياليت ما بالقلـب ياخـوك ينـذاع=وترتاح نفس(ن) زاد والله جهدهـا
مير البلاء أكتم ورى عوج الاضلاع=هم(ن) أسـر نفسـي وزود لهدهـا
هم(ن) ولو انه على جاهـد القـاع=زلـزل مبانيهـا وكسـر عمدهـا
كله سبب طفله غدت كلها اوجـاع=ضغط وتليف كبد والخافـي أدهـا
طفله بريئه منهكه عمرهـا ضـاع=رحلة شقاء عانت بها مـن مهدهـا
ليت الهناء ياخوك يشـرى وينبـاع=لآخذ من سنينـي واحطـه بيدهـا
لاشفتها ضاقت علي كـل الابقـاع=يطري علي وش عقب امر وأدهـا
لافي يدي حيلة ولاعنـدي اسنـاع=تمسي وتصبح يالخوي فـي نكدهـا
لاشك مـا للعبـد ياكـود ينصـاع=لامر الذي بيـده عناهـا وسعدهـا
ربك كريم وعارف(ن) كل الاوضاع=بأمره شفا عين الضريـر ورمدهـا
رحمك الله يا .. (( أسيل ))