[نايف هويدي العواجي]

يا زين من خاوا الرجال المناعير=اللي على ما قيل ربع وفيه
ربعن تحب البر وايضا صقاقير=راعين صيد ويعشقون القويه
لا لاح براق الامزون الشخاتير=وصوت الرعد يقفاه هل برديه
ثم جهز العزبه وجهز لنا الطير=نبغا دياراً با العطايا نديه
في خايعن فيه الخزاما مزاهير=وتلد عينك للورود الشذيه
والشاص حولك شايقن للمشاوير=يبغا دياراً بعيداتن فضيه
نسج لديار الحباري مداوير=والنفس تطرب كان نفسك شقيه
وليا قنصنا وغابت الشمس بعصير=صغيرنا يسويلنا شاذليه
الدله اللي تشرحك دون تعكير=وناخذ من الموال والسامريه
ومن القصايد هات قول الشواعير=اللي قصايدهم جزال ونقيه
ومن بعدها نبغا حليب المغاتير=خلفات وضح وللجراكل مليه
في جلست اهل الطيب واهل المقادير=والنار من زود الحطب دوم حيه
ترتاح من كثر الشقا والتفاكير=ومن الكلام بزيد ولا خويه
مع لك ربعن يجهلون المخاسير=كسابتن للطيب والمقدريه
اخير من مناظر المدن والسير=ومن الذي ما ينطق الا الرديه
ناسن تحسب كثيرات الدنانير=ورباحها اللي با الوطن داخليه
كلام واضح ما يبي اي تفسير=ما اورد الابيات من عنجهيه
وختامها باخر جميل التعابير=صلو على الهادي شفيع البريه