أقـول ياعاذلـي رح مالـك ومـالـي=نفس الفتى ماتحب اللـي يعـذربهـا
اناابخص الناس في حِلي وترحالي=النفس نفسي واعرف اشلون احاسبها
لضاق صدري وتاه من الغـثـا بالـي=والارض ضاقت وضاقت بي مناكبهـا
نصيت لي مرقبٍ في صحـصحٍ خالـي=في راس رجمٍ تصافـق بـي هبايبهـا
بارضٍ خلا خاليه ماحولـك الوالــي=بس الذيابه تعـاوي فـي مراقبهــا
جلست في مرقبي ابكي على حالــي=من حـرةٍ بالحشـا زادت لواهبهــا
وقامت تكسر بصدري عـبرة الجالـي*=اللـي قبـل يتِقـي لـد لمضاربهــا
وقمـت اتفكـر بوقتـي اول وتالــي=وشلون عقب الصفا شانت مشاربهــا
طاوعت ثنتيـن والثنتيـن غربالــي=استاهل اللي حصل لي من مصايـبهـا
يامن يوصـل لابوجـراح* مرسالـي=انا على العهد احارب مـن تحـاربهـا
لغبت عني تكـدر خاطـري السالـي=لغابـت الشمـس ماتنفـع كواكبـهـا
دامك رفيقـي ورب البيـت مابالـي=اضرب على الكايده مانـي بهايبـهـا
يالله طلبتك ودمـع العيـن همالــي=اغفر ذنوبي قبـل تِنشـب مخالبـهـا
احمد بن عبدالرحمن العريفي
(نديم المجره)
*وهو الذي جلا عن مضارب قبيلته بسبب جنايه ارتكبها
*احمد بن ثامر بن سليمان السعدون