اقدم لكم هذي القصيده عسا ان تنال على رضاكم =
الطيب يثمر بالرجال الصناديد = ولا الردي مالك عليه اتكالي
احدن يحوف الكايده شوفه بعيد = واحدن بعثرات الخلايق يلالي
واحدن حياته والفً البيت ووحيد= واحدن بمجلسه بوسط الرجالي
والطيب ما يشرى بالاموال ورصيد= وهبه من الخالق عزيز الجلالي
وانا ياماصديت واغضيت ياعبيد = والقلب كنه باحمر النار صالي
شفت الرجال اللي بزماني عواضيد= ما فيهم اللي بالشدايد صفالي
يااخوك انا مالي عليهم مواريد= لكن لحقني عوز والوقت مالي
ياعبيد انا ياخوك ابنصحك واجيد= بالغانمه ياعبيد هاذي منالي
خاو الرجال اللي كما شامخ الحيد= واترك هلاميد الرجال النذالي
وعلم الردى احذر يطبعك ياعبيد= كل شي ينسى والرديه استحالي
والغيبه والنميمه عطها تصاديد= ومجالس كثربها القيل قالي
وعليك بالصلاة ياعبيد تحديد= مع باقي الاركان وخير الاعمالي
والا صديق اللي يجيب التناكيد= اللي لفزعتهً كثير الجفالي
خله يولي ما بخوته تمجيد=هذاك ماني في ملاقيه سالي
وخلك مع اللي حافظين التقاليد= عن سلم جدك لا تفك الحبالي
واكرم ضيوفك لالفولك ملاهيد= واسلك دروب الطيب وكسب المعالي
واوصيك بالجيران خصاً وتعميد=المصطفى ركز عليهم مقالي
وختامها صلو عدد ماعلى البيد= على الرسول الخاتمي الموالي
وسلامتكم=