[مشاري بن فالح]

السلام عليكم

بعد مشاهدة الشيب في ذا الراس
كتبت هذه الرساله .. عله يطيع امري

:

متواضعه .. تقبلوها كما هي ...


يا شيب

ابيضْ مليت الراس وش فيك ياشيب=توّ العمر ماشفت من شمسه النور
قبلك زماني .. مستلمني دواليب!=والحين اشوفك منتظر جيّت الدور!
لولا الحيا لاخرّب الراس تخريب=وانتفك بالمنقاش لاصرت مجبور
اليا نتفتك بان في راسي العيب=و اليا تركتك ساهر الليل مقهور
ليتك رجل ياشيب واذبحكْ تعذيب=واعلن مماتك بالجزيره على الفور
واعيد وقتٍ زان فيه المكاتيب=وقت الوفا .. مافيه لاغدرٍ و زور
وقتٍ .. يزين البرّ مع خوّة الذيب=مانعرف الدينار..! وامغازل الحور
وقت الرجال اهل الدلال المهاذيب=اهل السطر.. واهل المحازم و باكور
الحظ .. عاثر مانفع فيه تطبيب=عاجز يداوي علّته كلّ دكتور
نهر الحزن مجراه وسط المحاديب=ولوعة همومي داخل الصدر ناعور
زهرة شبابي اذبلتها التشاعيب=وبستان عمري مابقى فيه عصفور
واللي سألني عنكْ أخدعهْ واجيب=(استايلي) ياخوك للراس ديكور
مايدري اني مشتعل باللواهيب=دنيا سقتني كاس من مرّها جور
مازدتني ياشيب وقرٍ وتهذيب=من قبل اشوفك عشت بالدنيا موقور
ان كان ماينفعْ معك زود ترهيب؟!= لاصبغكْ .. واجبر خاطر سنين مكسور

لـ مشاري بن فالح البدري العنزي ( هاجس الحرمان)

22/12/2010

:
: