هجاد الجرح وهموم الغياب ودمعي المسكوب = ولهب نار الفراق .. وزمهرير موادع الغالي
وقحل ريضان صدر(ن) من زمن مطلوبها مطلوب = رجاها في مقابيل الليالي طيبة الفالي
يمر اليوم.. وتمر السنين.. وعمرنا محسوب = وانا ضامي وصالٍ بعد صبر يحقق امالي
تعال وشب قنديل الفرح في صدري المكلوب =فديتك طول صبري هدني واثر على حالي
تعال بطلةٍ يحيى بها قلبٍ بها معطوب = سكنته قبل يسكن به بشر يالاول التالي
تعال بسحر يشموم الكلام ورقة الاسلوب =وبدد كل كرب وكل حزن يمر في بالي
كواليح السنين اللي مضت لي جابت الماجوب = ظلام يقتفيه من الهموم انواع واشكالي
سحايب طلتك رغم البطاء براقها مشبوب = تصبرني رجاوي جيتك عن نار غربالي
واذا كان الاماني بعد صبري حبلها مجبوب = يعيش الحزن في عين اليتيم ولا درى السالي
انا اعرف لو حزنت الحزن ما غير من المكتوب = ولكن موتي افضل من فراقك يا بعد حالي