مبطي وانا بينـي وبيـن الهواجيـس
وقفة تأمـل .. واستراحـة محـارب
عجزت لا افهم وش تقول الكوابيس
في كل ليـل تمـرْ .. والهـا مـآرب
من حقي اوزن كل ما فات .. واقيس
واشمر ذراعي .. واسدد .. واقـارب
وكان البحر قدمي .. وخلفي تضاريس
وبموت من حيتان .. والا عقـارب!
سلّمت صـدري للهوا والنسانيـس
وسوّيت من نفسي لنفسـي تجـارب
احلم .. ومن حلمي اشب الفوانيـس
واصحى .. على وقع الفتن والمكارب
هذا زمان الدرس .. من غير تدريس
ياللي ليا هالحيـن .. تعمـل تجـارب
ان شفت بيضة ديك .. والا لبن تيس
حاول تصدّق عينك .. ولا تغـارب!