أكبر قهر دفعتي للطيب والجودي=والعاقبه قطعة اليمنى من اقصاها
ياصاحبي هالوقت لو كنت كالعودي=جمر الردى يحرق الطيبه ويشناها
ضريبة القرم لامن عانق سنودي=ضرب القفا بالخفا والظلم يزهاها
حسبي على اللي غدا بالخلف ماجودي=من حرّته يزرع الكذبه ويدراها
لا خايفن خالقه ماله عن النودي=متزهمل الناقصه متعصّب رداها
اكبر طموحه يصيب الطيش بارودي=لا واحسافة اماني ضاع مبناها
مايدري ان العطا من شيمة جدودي=والروح تكسب من الافعال احلاها
اشيم عن هافي الكلمه ولازودي=والحقره قَسْم العفن لا زاد يلقاها
مالي بهم يافتى قاله ولا ردودي=دار الخلا نزلهم بالصيف وشتاها
ياكود نشمي نعد بعرفه الفودي=ارضه كريمه ووبل العز اسقاها
في هرجته كنّه القاضي وموعودي=منه الزلل غايبن والكبد ماذاها
يسخا بكف الوفا ويجسّر عضودي=وانا على مامضى اماثل اعطاها
اكبر قهر غلطته ان جات بحدودي=ان كان مقصودها للعين اعماها
ان كان برق الحسد يلوح بصعودي=برقي على ديرة المذكور ما جاها
ماكنت اعرف البشر وانه كما البودي=هياكله لامعه والزيف يكساها
حتى لفت غارقه بالبهت والكودي=وقته عرفت الجسد يشكي طغا عظاها
لا صار قلب الفتى غاير وملهودي=ظليمة النفس تسهل حين بغضاها
اكبر قهر دفعتي للطيب والجودي=والعاقبه عضته لليمنى واقصاها
ياصاحبي بهالزمن احذر من العودي=للسَلّم الاول مدام الخلق بعياها
واياك تحكم على الازوال والبودي=حتى تشوف الصدق عامر ويهناها
عند النجاح اتحضر وتقول ياسعودي=يمناك هاته ترى يمنايه غطاها
اقولها والخطا مابيّح سدودي=يالله عسى ظالمي بالنار ولِّظَاها