[المسيكي]

.................................................. .................................................. .......................

.................................................. ........................

دورات وقتي والزمن مع لياليه = أظروف وقت ٍعشتها بالثواني
وكل ٍ يعيش وهمه اليوم مشقيه = وأنا شقايه حافني واحتواني
أمسي بهم وياتي الصبح يمحيه = وأصبح وياتي هم بالقلب ثاني
هم ٍ تولّج خافـقي دوم يغزيه = مكتوم لكن ينطلق به لساني
أسباب غرو ٍ دايم القلب يطريه = أنشهد إنه جاب ليه الجناني
لا ياحبيبي كيف قولك توديه = دروبك غدت مابين شام ويماني
اوعودنا ياصاحبي نلتزم فيه = لكن أشوفك قمت تمشي اجنفاني
واعرف ترى كثر الجفا منك تنويه = وهذي بدايه تنتهي بألاماني
أنا وفيت وقولي اليوم موفيه = ماجيت أدور للردى والهواني
ومثلي قليل ونادر إنك تلاقيه = واعرف ترى قل الوفا في زماني
قلبي تولّع وأنته اليوم طاويه = طي المَحَص من عقب كدن السواني
أنت ِ البحر ظلّم عليّه به التيه = ببحور حبك ضايع بلا مواني
وأنت ِاليبس وأنت ِالصحاري المهاميه = بالقيض وأنا بوسطك بلا عواني
وأنت ِالفضا بك كافخ الريش ترميه = من الخضيرا تحوّله بالطماني
وأنت ِ المزون ورايح الريح ينحيه = أرجيك لكن مانزلت بمكاني
وأنت ِالحيا توعي لي القلب تحييه = يرجي وصالك والغلا والحناني
وانت ِالربيع وداله ٍ في نواحيه = لاهب ريحه موّه الديدحاني
وأنت ِالمَحَل قلبي يجيلك وتجفيه = لاماك يبغى وتزله القلب عاني
وأنت ِالسراب وحامي اللال يبديه = أجيك لكن تبتعد بقـفـياني
وأنت ِ القمر لاظلّم الليل تضويه = ويغيب نورك يقـتفي مالفاني
وأنت ِ النهار وتايه الدرب تهديه = وبالوقت ذاته أنت ِ الليل جاني
أنت ِ حياتي ولأجلك العمر نفنيه = أنت ِ سنيني وكاينه في كياني
وان مارحمتي لقلبي اليوم هاتيه = ردّي وهاتي قلبي بلا تواني
ردّي لقلبي وقولي اليوم هاكيه = لاتجرحينه بالخفا والبياني
وإن مالتفت ولا انته اليوم حاضيه =يروح يفنا وداعي الموت حاني
خله يولّي ياعسى القوم تقنيه = يرمى بحد المرهفات السناني

وسلاااااااااااااااااامتكم



فهد المسيكي