[فهد الخالد]

يا ليتنا لا تفرقنا تجمعنا
وياليتنا لا بغينا الشي نرهي به


كان اشترينا مع الايام ما بعنا
ولا احترينا الزمان ولا مناديبه


لعلوم بعض العرب ياما تسمعنا
اللي مافي حبهم شكه ولا ريبه


نراقب اخبارهم والشوق قطعنا
"حب بليا مواصل" ويش نبغي به؟؟


والله لوالوقت قاسي ما يطاوعنا
هذا الخبر وافهمه كانك ما تدري به


تقول لا يا حبيبي لا تقاطعنا
واقول لا مر طيفك ويش اسوي به؟؟


لولاك في الحب ما اضمينا ولا جعنا
والشوق في قلوبنا نقبل ونقفي به


يا ليتنا في غرامك ما تسرعنا
على الاقل ننتبه .. ويش انت ناوي به؟؟


ضيعتنا في الزمان اللي مضيعنا
متى بترجع لنا يامطول الغيبه؟؟