فيه وحده .. وحده ونص.. و الا وحده وربع خخخخ
لا.. وحده آدميه من دم و لحم .. و لها قلب و إحساس و مشاعر .. ماشالله احساس و مشاعر .. عضوات معنا بالمنتدى و من أشكس الأعضاء .. حلوه أشكس ..
المهم ..
الوحده هذي حبت واحد .. مدري وش معجبها فيه .. الخشم كنه مزقاط كيرم و العيون خرز سبحه .. و هي معميها الحب الله يهديها .. المهم .. مع بعض سنه كامله و كل واحد يموت باثاني .. طبعاً البنت تحبه من قلب .. بس هو .. و الله مدري .. يقول احبتس بس والله ان الحب غرب و هو شرق .. على باله الحب بلستيشن .. و البنت ما يحتاج اقول لكم .. دايم تحكمها عواطفها .. و الله ما تراعي للي قدامها .. لو قدامها عدامه كان متقرشعه بها .. الأهم.. العلاقه استمرت .. اممممم سنه و بعدها .. أخذ عفشه الأهبل و رحل .. بدون احم و لا دستور .. و البنت تفاجأة بغيابه .. و تبهذلت .. جاها وجع بالركب و حكه بالراس و صخنه تدرون ليش .. لأنها نامت على المكيف بدون غطاء .. خخخخخ لا .. السالفه ما هي سالفة حبيبها .. طبعاً مع الوقت .. و من الوسوسه و تفكيرها بحبيبها .. جاها مرض القهقار الوسوي خخخ قصدي الوسواس القهري .. صارت تشوف الباب و تدخل مع الدريشه .. و تصب القهوه بالكاسه و الشاهي بالفنجال .. جتها أنواع التفكيرااااات المجنونه .. و حتى موقف صار عليها .. جتها وحده من بنات جيرانها ..
قالت وش بلاتس يا بنت الناس..
ردت عليها وقالت : بنت والا ولد ..
جارتها : لا بالله منتي صاحيه ..
قالت : صاحيه والا نايمه ..
جارتها : بسم الله عليك .. شكلها عين ..
هي : عين و الا خشم ..
جارتها : يا حبيبتي أنتي وش فيك .. قولي لي .. و الله ما يدري أحد ..
هي : أحد و الا سبت ..
.
و قعدت جارتها تحاول فيها لين .. جاء اسعاف من مستشفى نفسي ... لا .. لا .. ما أخذوا البنت .. أخذوا جارتها خخخخ
لأن جارتها انمرضت و هي تسولف معها ..
.
المهم سنتين و المسكينه تصارع نفسها .. يوم مريضه نفسياً .. و يوم مريضة حب . و يوم تهلوس بكلمات ما يدرون وش معناها .. جابوا لها مترجم ..
و المصيبه .. بعد يومين .. لقوا المترجم شانق نفسه بشارع خريص ..
.
بلشوا بالبنت ..
و بعد سنتين .. بدت تتحسن حالت البنت .. و رجعت لشكلها الطبيعي .. و انتهى مرضها و لله الحمد .. و قعدت تزور العالم و تشوف الناس .. و أبشركم قامت تدخل مع الباب .. و من زود العافيه ما شالله .. راحت تزور جارتها اللي بالمستشفى النفسي .. و عزت أهل المترجم ههههه ..
و نست حبها و حبيبها .. و فتحت صفحه جديده مع الحياه ,,
و المصيبه العظمى .. بعد هالسنين جاي حبيبها الأول .. على قولت الشيبان .. جاك يرثع .. و بعد هالفراق و هالسنين .. جايها يقول أحبك .. يا أخي وش ناوي عليه .. ناوي تدمر حياة البنت مره ثانيه .. ناوي تقضي على طعم الفرح اللي عاشته بهالفتره .. ناوي تذبحها .. ناوي تلعب عليها لعبه جديده .. الحب مو لعب بلستيشن و الا شطرنج و الا بالوت .. الحب احترام و صدق و تقدير ..
خلاص البنت نستك .. و يا خوفي تثق فيك بعد هالغياب ..
.
.
و اذا رجعت له .. للأسف .. لاتعليق ..
.
.