دام الصداقه ما لها جذر وشروك=اضرب عليها الإكس وإلعن ثواها
ملعون ابو من يجحد الطيب .. صعلوك=ومن باع خوة صاحبه ماشراها
الرفقة اللي مابها عقد وصكوك=اموثقه بالطيب في محتواها
ماتنبغى لو جمّلوها وجابوك=وقالوا تفضلها على ما تراها
لابو العفانه لابو عرفتك لابوك=يابن الردي .. ديرتك ماني بسماها
يمنايَ ارفع من مصافحك يالعوك=يسرايَ تكرم عن ميامن طماها
انا عشير اللي الى جو حطوك=باقصى المراجل .. واقفٍ من وراها
نسل النشامى ماهم نسلٍ من ابوك=والنايفه تصعب على من بغاها
مايكسبه هافي وضايع و معكوك =غير النشامى ما يتناول مداها
علاقتي معهم مهي .. عطني ودوك=على النقا نمشي وواضح خفاها
لاجيت انادي فردهم قلت : ياخوك=احرص على عمق الصداقه معاها
روحي فداهم .. فوقها كامل البوك=كل الذي املك فدا في ذراها
اكسب معرفتهم ولا يبعدن شوك=كله ولا اخسر مشاهد ضياها
هذي الصداقه ساسها جذر وشروك=تنحت صخر والعفن يكتب بماها