امس العصر اتصل علي ( صايل ) ولد عم ابوي بس رضاع .. و قال يا بو فهد نبي نلعب مباراه الليله بملعب على كيفك .. اتطاردبه الحمير .. قلت و شو .. قال اتطاردبه الخيل .. قلت اشوا .. قال هاه وش قلت .( بيني و بين نفسي قلت يا ربي لك الحمد .. توك تلعب كوره يوم جاء رمضان ) .و طبعا أنا فكرت و لقيت اني فاضي و عطيته كلمه .. قلت : تم .. و لو عندي شغل أفضي لعيونك ( وربي لو عندي شغل ما جيته ) .. المهم .. جت الساعه 11 و أدق على صايل .. يا صايل الملعب و ين مكانه .. و هو قاعد يوصف المكان .. مريت من عند حارات .. لو معي ددسن ما دخلت مع شوارعها .. و الرجال يمين يسار فوق تحت.. لين وصلت الملعب .. و افتح عيوني .. الملعب صغير .. و ما فيه اضاءه .. على لمبة الشارع .. و أرضية الملعب يا ساتر .. لو تدخل السياره كان يصيبها قطع بالرباط الصليبي ..
شوفوا شكل صايل و هو متشنطح بالملعب ( على فكره هذا قبل نبدا المباراه .. انهد حيله .. )
يا حليلك يا صايل .. اسمح لي بحش فيك هنا ..
صايل رغم وزنه لكنه شاب طموح و يعجبني فيه انه شايف نفسه حريف كوره و هو من جنبها .. و لازم يجيب معه بين الشوطين همبورغر و عصير عائله ببسي .. و فيه حركه و ربي ما يدري عنها رونالدينهو .. ما يطبقها إلا صايل ..
.
و طبعا شلة صايل لزموا عليّ اصورهم بس و الله من قرادتهم هالصوره ..
آخر واحد يسار هذا أخوه فهيد .. حبيب بس شرس عند اللزوم و اللي جنبه أول ما شفته قلت سواقهم البنقالي بس طلع حامد ولد خال صايل و اللي جنبه حكم المباراه اللي و الله لو يدري له خليل جلال كان أعلن استقالته .. هذا ولد خال صايل بعد و اسمه رمزي و اللي جنبه سليمّ أخو حامد .. و شوفوا ماسك الكوره على باله بيليه و الا مارادونا ..