[سعد النفج]

عندي طلب قبل ما تقرا و هاك طلبي=من قبل ما تمدح القيفان نقدك جبه
ماني مجمّع تفاهت حرفي بمكتبي=بكره يقولون ربعي يا ردا مكتبه
من قبلها كل ما حاولت فتل شنبي = قالو قليل السنع .. صغير ! وين شنبه
و انا مواليد الاربع و القصيد يهبي =ان كان ما جاء بوسط الكاس لجل اشربه
ابشربه لين من شربه يخيب تعبي= و لين يتمثنا بصدري و انتهض و اكتبه
واشب نار القصايد و اسحب من حطبي=على هواي اقترب يمّ الحطب و اسحبه
اشعم بيوت القصايد .. يا بيوت ارحبي=ترادفي بالورق و انا عليّ انتبه
عليّ اراعي مواطيّه و اشوف عتبي = يوم ان بعض العرب ما ينتبه لعتبه
يسبيه وحْل المواضيع الكئيبه سبي = ما يرتقي للنجاح .. و للنجاح سببه
وش لي بتأييد علماني و سلْم اجنبي = وش لي بسب الرجل و ملاعن لمنسبه
وش لي اواخذ ضعيف النفس و المذهبي =انا على مذهبي و اصد عن مذهبه
الشعر ما هو عبث يا اهل الكلام الغبي= الشعر ذوق و عذوق ٍ نقطف من عنبه
إلا القصيد الحديث المبهم اللولبي =ليا دق ناقوسه اذني كيف ابستوعبه
رمزية الشاعر اللي ما فهم وش يبي =و شلون ابفهم معانيها و هي تتعبه
لا والله الا عليها ما ثنيت ركبي = غير القصايد يدوّر شي ٍ يناسبه
خلوني من القصيد اللي يثير غضبي = كل ٍ بعيره على ما يشتهي يشعبه