[عيد الوطيف]

شاعرية مزيد الفذة ، هي ما أزجي به عذري لكم على هذا الغياب الطويل ، والتأخر في الرد ، ولكن ما أعلمه من أبي راكان ، هو عذري وأملي في قبول هذه المتواضعة ..

حي الذي بالقاف يسند على عيد=أصبح على التلميذ يسند استاده
كن اللحن باسمي على شفاه تغريد=كن الموسيقى مدغمه في اسناده
عميد حرف القاف بين القواصيد=لا مره المعنى على طول صاده
لا هد مزيد والله ابشرت بالصيد=وقت الهدد يعجبك حزة هداده
حتى من افعاله تشيب المواليد=شيخٍ بوقت الحرب يفحم جواده
كلمه من لسانه على الناس تعميد=والطيب منّه عمدته واعتماده
شيٍ يعد وشي من دون تعديد=وشلون اعد اللي له الطيب عاده ؟!
من مجده فعله م يحتاج تمجيد=ماشي على دربٍ مشوا به اجداده
من لابةٍ يوم اللقا بالبواريد=افعالهم تشهد بليّا شهاده
عدوهم جدواه همٍ وتسهيد=وخويّهم بالطيب يكرم وفاده
بيضا نثايل شاهده للصناديد=يومنّها ثارت بليّا هواده
تعجز بحور الشعر تنقص ولا تزيد=لا صار سوق الشعر يعلن كساده
والحرف يعجز عن بيان المحاميد=حتى القلم بالحرف جف بمداده
ما جيت اوكّد لك مقامك بتوكيد=وانت الذي بالقلب ماخذ وداده
واللي على اخوانه يعد المناقيد=يشين ظنه يوم شان اعتقاده
تكفى يبو راكان خل الحواسيد=وكلٍ على ما قيل يلقى مراده
اللي زرع سمه على الحقد والكيد=يجيه يومٍ فيه يلقى حصاده
الله قسم لعداك فرقا وتشريد=ياما يموت بخوف قلبه شراده
انت الذي وقت الوزا والمناكيد=سيفٍ نسلّك بالوغى من غماده
عجزت ارد القاف أبدا ولا اعيد=اعذر قصوري واشرب الشاي ساده