اسعدتم صباحا ومساء وحبيت اقلد الشاعر سعد النفج وانبش لكم من القديم ووجدت هذه الابيات
اشهـد ان الحـب مـالـه لاطبـيـب ولا دوا=غير لااعلنها صريحه من ضميرك يعشقـه
كان قال ان نجـم حبـك مـن سمواتـه هـوا=كـل بـاب ٍ بيننـا مفـتـوح لازم نغلـقـه
مايتوبـع جـرة المقفيـن عـالـي مسـتـوا=غير من يرضى الاهانه فـي حياتـه تلحقـه
يالحبيـب اللـي نطقهـا فـي لسانـه وانتـوا=بالسلامه رح عليـك القلـب مانـي مرهقـه
قربك اللي كنت اوده صار مـع بعـدك سـوا=لك جماله يـوم قلبـي مـن غرامـك تعتقـه
ويش جابك بعد مااطفيت الغـرام اللـي ضـوا=تنفخ بتـال الرمـاد ولاانـت قـادر تحرقـه
دام ماتقدر علـى الهجـران ترفـع لـك لـوا=ليه قول ٍ ماانـت قـده فـي لسانـك تنطقـه
آسف ارحل عن حياتي .. قصرك الماضي خـوا=جاء بدالك شخص عاهدني وانا اخـذت الثقـة
ولاني بطاوي حبالي مثـل مـن قبلـي طـوا=وانت هاك الكاس اللي ذوقتنـي منـه وذقـه
وان لقيت انسـان غيـري لاتغيـر لـه نـوا=صح له شوقك وكـن بالشـوق دايـم تسبقـه
من قرصْه الداب لو هو شاف له حبـل انكـوا=والفرص ماهي على سايـر زمانـك مطلقـه
كانت ضاعت منك الاولى وجتك الاخرى لاتغوا=يمكـن ان مافيـه فرصـة ثالثـة متحقـقـه
وسلامتكم