((ما عدتلي ملهم))
خلك على ظلمك وقمة غرورك= قلبي قبل هجرك له ايام هاجرك
ماعاد تفرق غيبتك مع حظورك= وماعدتلي ملهم تسميه شاعرك
لعبتها واتقنت (تمثيل دورك) = كم مشهد(ن)ولعتني فيه خابرك
خسران ربحك من تجارة شعورك= واللي ربحته هوخسارة مشاعرك
حب التصنع واحد(ن) من بحورك=ياليتني قبل اعبره كنت حاذرك
الحب صدق احساس ماهو بشورك= تمشي مسير مامشيته بخاطرك
ارواح(ن) الفتها تسبب سرورك= ماجيت اساوم فيه والا اكاسرك
عليت شانك وانت هديت سورك=تعبت وكتوفي حناها مسايرك
ماني محطه في مراحل عبورك=لاقفيت ودعتك ولاجيت ناطرك
ولاني على خبرك ولا قد جورك=ما تنجبر نفسي ولاني بجابرك
انسى غموض وروح دبر امورك= وتلقى بدالي من تحبه وياسرك