السلام عليكم ...
متواضعه لشموخكم ..
:
يا الأدمي عمرك ترى يوم مـع يـوم = قلي بدون سلوم ويـش انـت ذاخـر
من لايورث نافلـه عقـب مرحـوم = اسمه يجي باأتلا الـورق بالآواخـر
من شال دم اللي لـه افعـال بعـزوم = يطيب ذكـره مثـل عـود المباخـر
ومن يحسب ان العز في لبسة هـدوم = تشوف نفسـه فـوق روس المناخـر
واللي على الهزلات جاسر ولا يشـوم = يشوم عنه الطيـب وقـت المفاخـر
تلقى بوجهـه مـن دنافيسـه وسـوم = وصدره كماجذعن من السوس ناخـر
ومنهو يضيّـع فرصتـه كنـه البـوم = يلـوج ليلـه واول الصبـح شاخـر
زل النهـار وحيلتـه كثـرة الـنـوم = كلن يلوحـه ضاحكـن منـه ساخـر
مـن لايقلّـط شذرتـه ياكـل ثلـوم = من سطـوة الدنيـا تجيـه المساخـر
وبعض النفوس اليا مشت حيث ماتروم = مع المدى تفصح عن الوجـه الأخـر
تلبسك ثوبن عقبـه تصيـر مرجـوم = باوسط جهنم بيـن الاصفـاد داخـر
ومن يِمحي السيات بالذكر والصـوم = ياتي بعلمـن بيـن الاشهـاد فاخـر
تاخذ يمينـه صفحتـه غيـر مغمـوم = قمـة فخـر يامحصيـن للتفـاخـر
ومايبلغ الساحل سوى متقـن العـوم = ولا تامن السقطـه عظيـم البواخـر