إذا المراجل لبسة شماغ وعقـال * قـل للعـذارى يلبسـنّ العمايـم
ما عاد يفرق زول حرمه ورجال * دام الفعايل تشبـه البعـض دايـم
المرجله ما هيـب كلمـه وتنقـال * وتروح ما راحت هبوب النسايـم
وإلا خشونة صوت أو رفع الأثقال * أو رزة صـدور وفعـل الزلايـم
ولا هي بعد مفتاح موتر وجـوال * وإلا ردى لسانـن حديثـه شتايـم
المرجله شيمه عن القيـل والقـال * رفيع نفس (ن ) حر بالجو حايـم
المرجله عقلٍ وزن وزنـه جبـال * ودون العقل وش فرقنـا والبهايـم
يا مسندي لو مايل الوقت بي مال * يا ولد أبويه يـا عظيـم العزايـم
يا معرب الجدين من العم والخال * يا نخوة المفزوع وقـت الهزايـم
المرجله يا خوي هي طولة البـال * هي العزم هي الصبـر فالظلايـم
فيها الكرم عـزه دلـه وفنجـال * فيها الكرامه عن ردى الطبع شايم
والدين لامنه خذا القلـب منـزال * مشى طريق الحق وابليـس نايـم
ومن لا عرف ربه في طيب الحال * لابد وقت الضيـق بالهـم هايـم
حتى صلاتك مع جماعات ورجال* في خيرها يا خوي نعـم الغنايـم
ولامن نصف ليلك قم صفي البال * يا عظم أجرك بين ساجـد وقايـم
ولا من رفع ربي له كل الأعمـال * حسن الذكر لا قالو فـلان صايـم
وخلك شريف القصد يا طيب الفال * سوء المقاصد فالبيـوت الهدايـم
واحذر تبيع النفس في دب الأنذال * وتتبع خوي إبليـس راع النمايـم
النفس خيل لك إذا كنـت خيّـال * ومن لا قوى نفسه قوته الهزايـم
ولا صرت ما تدري لو يش أنـت رجال * والله خسارة فيك ذبح التمائم
اتمنا ان تنول على اعجابكم
اخوكم
فهد محمد السلقااااوي