شهيق ............
أقرب / أقرب لاجلك الشوق إستباح=كل عرقٍ من عروقي وإنت غايب
أقرب / أقرب شوف طرفي مااستراح=من رحلت وساحته جمر ولهايب
أقرب / أقرب شوف نبض القلب راح=ينشد الاقصين عنك والقرايب
ياجنين النبض لو من راح راااااااح=كان دمي من هوى لاماك تايب
هزّ كف الشوق صبري لين طااااح= من عناقيد التوجد دمع رايب
وجز ناب العذل بـ / افواه الملاح=ستر قلبٍ من وراه الجرح هايب
كم شهق قلبي من عروقه وناح=لابحث عنك وطيفك فيه ذايب
كن غيرك ذنب وإنت اللي مباح= وكن قربك عيد وفراقك مصايب
إنت بُعدك حرب والشوق إجتياح=والوله في خاطري شيد نصايب
لاتقول الصبر صبري فيك باااح=مايطاق الصبر بغياب الحبايب
يافضا عمري ياعمري يالبرااح= داو بي جرحا شكى حر اللهايب
زفير ........
لبيه ياللي عروق القلب من جوه=لولا ضلوعي تفز إن جيت وتخمك
الشوق كافر وتدري مابه مروه=ملعون مجنا الى من ذاب في دمك
مافيه رحمه قليل الاصل والخوه=بس حاتمي بالمواجع لااتجه يمك
يصهر وريدك إلين يشب لك ضوه=ولاثار جرحك هبايب عطره تشمك
وينبش عيونك مدامع لين تتأوه=شفاه المواجع بصدرك ماهي بفمك
الشوق صحراء تضيع إن تهت في دوه=تمسي خلاوي وتصبح وحدك بهمك
والشوق لو ينزرع بصغيّرٍ توه=لو تسأله ياصغيّر ماتعرف أمك!
تلقاه من جور مابه مختلف جوه=ناسي صحيح الإجابه ماهو بيمك
وأنا نسيت الحياة وجيت لـ / سموه= ودي أكب الوله من كمي لـ / كمك
سرابي الشوق غصب وجابني قوه=إلين ماأوقف مراسي قلبي بيمك
عيناي عطشى ( فديتك ) أكرم وروه=عذبك / قراحك / رحيق الود من جمك
معاك وحدك أحس القلب يتفوه=بـ / أغاني النبض لاجاب الحكي لمك
شفني الى أقبل خيالك وإنتشى نوه=تزهر بروحي ورود الشوق من يمك
أعطيتك القلب وافعل ماتبي سوه=بس أعطني وعد حصري دمي لـ / دمك
فقط القليل من الرضا من ذائقتكم النقيه
هو جُل الأمل