بسم الله الرحمن الرحيم
السلام عليكم ورحمة الله وبركاته
بسم الله والحمدلله والصلاة والسلام على رسول الله صلى الله عليه وسلم
أما بعد:
يقول ابن جلعود للمجد عنوان=وعنوان تاج المجد صقر الجزيره
عبد العزيز الوايلي نسل عدنان=سطّام عيلات الليال العسيره
يوم انتخا بنوره وصوت بليهان=ردوا عليه أهل السيوف الشطيره
قالوا له آمر قال ضاري وعطشان=كبدي على نجد المكارم مريره
قالوا له أبشر ياسلايل كحيلان=حنا معك بالطايله والقصيره
قال البسوا لعيونها بيض الأكفان=(يالله عسا ماتكره النفس خيره)
سروا معه للموت ذربين الأيمان=من فوق عيس ٍ بالفيافي خبيره
سروا معه في سكت الموت شجعان=لعيون بنت المجد شدوا المسيره
سروا معه لاما فتحوا قصر عجلان=ونادوا بأن الأمر رد لأميره
نادوا بأن الحكم سنه وقرآن=في حكم أبو تركي زبون المغيره
نادوا بأن القتل والظلم طغيان=وان الصغيره بالمظالم كبيره
نادوا بأن الناس في حكمه اخوان=مسلم سعودي ولاتهون العشيره
من حد عرعر حدها لين نجران=ومن الخليج لبحر جده يديره
أدارها صقر الجزيره بميزان=لاما اعتلت فوق النجوم المغيره
والحمدلله ننعم اليوم بايمان=وأمن ٍ على الأرواح في كل ديره
ياجعل أبو تركي بروح ٍ وريحان=في جنة الفردوس ربي يجيره
وصلوا على المختار ماكوكب ٍ بان=واعداد سوقات المزون الغزيره