[سعود المسعودي]

المشاركة الأصلية كتبت بواسطة عبدالله سماح المجلاد

هو نص متواضع يسموا بكم طرحته من اجل التواصل الذي أتشرف به معكم

ياللي تعطر عالمي من دخونك= وش فيك ضايق صدر واحوالك أحوال
وهَرْجْ الغرام اللي حكت به شجونك =سِمِعْتْ انا يا مرهف الحسّ وش قال
كنّ الْحِزِنْ غيمٍ غشا كل كَوْنَكْ = واضحى مطر من مزن عينيك همّال
تفضح سِتِرْ هَمّكْ سحابة عيونك = تنثر مخايلها وِكِحْل الْهَدَبْ سال
واللي نِزَلْ، واللّي وِقَفْ في جفونك = يحكي وِجَع ،وجروح روح، وعنا حال
متغيّرٍ من ضيقة البال لونك =لا بَيّض الله وَجْهَهَا ضيقة البال
كم قلت لك لاَيَاخِذِنّك ظنونك=ومن حال ترمي بك شِكَوْكَك على حال
وانا جنوني بالهوى من جنونك =وحبّك هنا بضلوعي العوج مازال
مقعول اكمّل رحلة العمر دونك =هذا الكلام ،اهبال ،بهبال ،بهبال
قلبٍ لِبَسْ ثوب الوفا ما يخونك =وشلون وانت احلام عمري والامال
واذا تبي تعذيب مغليك دونك =كلّي وعذبني يا بو رمش قتّال
عذّب وعذّب ياحبيبي بهونك =عَذِّبْ وانا مرتاح في كل الاحوال
أطعن وتزهر بالضماير طعونك= وخلّ الطعون اب(جَرْهّد)الجوف تختال
وشاهد بِوجداني تمايل غصونك =لاَهَزّهَا ريح الغلا عَوْدَهَا مال

وجهك ابيض وهالجزله اكبر من مجال التعليق تقبل مروري ودمت بود