مساء الخير .. بدون مقدمات
الكلمه اللي مالها حق ٍ علي = عيب ٍ علي اقولها وسط الرجال
لاصارت الشرهه تبي تلحق هلي = وش لي ازودها اذا طال الجدال
ماني معلم "زيد" ومربّي "علي" = ولاني بشر كامل ولله الكمال
لكني اعرف وين وجهة مدخلي = ولاادور في فكري يمين ولا شمال
ليا حكيت اجيب لي علم ٍ ملي = وليا سكت اسمع ولا فيني هبال
حقي اذا يزعل خويي ما..علي = وأن لامني خبل ٍ فلا القيه بال !!
قم ياابن ابوي وتاج راسي ياجملي = آبتقهوى الكيف من صفر الدلال
عسى الهموم بوسط صدري تنجلي = لاصارت بقلبي مثل حمل الجبال
يالله ياالوالي ولاغيرك ولي = أنك تهونها علي بكل حال
بالساعه اللي مايفيد إلا عملي = وأنت الوحيد اللي عليك الاتكال
يالله انا طالبك تشتال جهلي = وأنك تجملني مع "عيال الحلال"
الطيب يبراني وانا ماني خلي = من "الفقر" و"القلّ" فوق الاحتمال
عايش وقدري فوق واعرف منزلي = لاصرت اعز النفس عن "ذل السؤال"!!
ليا ابتليت الله يعين المبتلي = لاصارت "اللقمه" بحلقه لا..تزال
وشلون يبلعها وله قلب يغلي = حتى لو انه يشرب المي الزلال
ذكيت بالي كني مذكي "طِلي"= من خوف قال فلان وإلا فلان قال
الشعر ماابي منه "مال" ولا "حِلي" = ولااعتبرته "طيب" وإلا "راس مال" !!
بعلمك ياقلب واسمع مايلي : = وابشرح الجمله على ابسط مثال
دام الشجر ثابت وراسه معتلي = خل الذي ماطاله ..يدوس الظلال !!