يقولون وشفيك امتغيّر وحالـك حـال
وانا اقول مايبقى علـى حالـه الاّ الله
زمنّا ياكم غيّـر معالـم وهـد جبـال
وانا مثل من قد عاش والحالـه مقِلّـه
انا ماني بتاجر ولاني برجـل اعمـال
اعانـد زمانـي واتـحـدّاه واذلّـــــــه
مع الناس والدنيا مسافه وانـا رحّـال
وشهريـن منعقـده ويوميـن منحلّـــه
مقادير وضروف وهقاوي وقيل وقـال
ووضع ٍ يكدّر صافـي البـال ويعلّـــــه
تعيـش الاوادم بالمنـاوي وبـالامـــــال
ولا احد ٍ بيدري ويش وقتـه مزينلّــه
ومن ربّته سود الليالي علـى الغربـال
وقامـت بنـار الهـم تصـلاه وتملّــــــه
غدت خوّته للحظ الاقشر ونَس وهبـال
مابين الفرج والضيـق يغويـه ويدلّـــه
ولا اشين من الدنيا لامالت على الرجّال
لاجل تجبره لقصيّـر الجـدر ولضلّــــــه
وهو طول عمره يرتكي للزمن لامـال
ويبرك لحمل الوقـت لاثقـل ويشلّــــه
يسد اللـزوم وللنشامـا ذرى وظــــلال
ويحفظ الجميل ويجمَل ويدمـح الزلّــه
هاذي والله اللي تتلف الرجل حال ومال
وتقلـب حياتـه غـم وتغيّـره كـلّــــــــه
منقول