[هذه الهجينيه البسيطه هي اهـداء الى الشاعر الكبير مانع بن شلحاط بمناسبة قصيدته (الحداثه)
****************
ياصاحبي بي طفش واحباط =وط الـــمســجل يبــه وطـّـــه
وافرش لنـا بالربـيـع بســاط =وشـنـطـة معامــيلنا حــطـّـه
وقـلـط دلال تــقـول بـطــاط=واحـمـس تـرا الـكبد مـنـبطـّه
ولـقــّم وخـلـه ثـلاث اشــواط=وجـره لاجــل تـركـد وغـطـّه
واجــذب لـها الـجمر بالملقاط=وبـهـر،شـذا الـهـيـل له عطـّه
وبلـغ سلامــي لابـن شلحـاط=اللــي سنــام الشعـــر نطــّـه
قـال الـحـداثـه حـكي وخراط=عــز الـلــه الــحـق مـاغــطـّـه
صــار اكـثـر الشـعر بس هياط =وتـشــارك الــقـط والــقــطـّـه
مـثـل الـقـطـاوه بـشهر اشباط=ازعــاج واصــوات مـنـحـــطـّـه
بـــغــوا مـثــل فلـسفة سقراط=وردوا عـلـى الـفـول بالشطـّـه
مـعذور كـانـه زعــل واشـتـاط=حــتــى الـمـشاعـر غـدت قـطه
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــ
( مفوز التبيناوي )