كـــل عــام وأنـــتــم بـخـيـر
بصـمــت......
سلام ياجرح الفراق اللي مضى له حول عام=كل عام وانت بخير ياجرحي وانا بمليون خير
العام يكفخ خافقي حتى ولو جوي غمام=واليوم وكري والهوى عاتي ولا يقدر يطير
ياخافقي اصبر وانا صابر معك خلك إمام=وآمن بمكتوب القدر دام ان رحاته تستدير
أول تحضنت الغلا وأصبحت في برد وسلام=يوم أن قلبك ممتلي بالحب يالطفل الغرير
بذّكرك بأول لقا يومك تعيش اول هيام=يومك لمست أطهر بشر ثم صار الأول والأخير
عدت سنه عقب سنه عقب سنه والحظ قام=وراحت ثمان سنين عايش بين فيّك والهجير
كنت أحسب ان نبضات قلبك يوم ماتقدر تنام=ينبض خفوقك شوق للي داخلك ماله خشير
والحين يوم ان الرحى دارت وضيعت الغرام=جات الليال السود تسبح فوق وبليا نذير
جاتك ليال ٍ همها بس التفنن بالظلام =غطت معالمها على جوّك وجا موج ٍ غزير
حتى كلامك تمتمه ولا يعتبر أصلاً كلام=مابي أركز في كلامك لين تبصر ياضرير
أدري بأنك وافي وصادق وعندك أحترام=وتكره أبو وجهين والخاين ومعدوم الضمير
لكن إذا بتمشي كذا بتضيع في وسط الزحام=ويصير ليلك دايما ً مابين نار وزمهرير
حوا ترى ضلعٍ عوج بيدينها عدة سهام = أما تسايرك المشي وإلا تخالفك المسير
أدري عيونك زايغه ولا يطوّل بك صيام = بس ان عشقت اعشق ولكن قبل تعشق استخير
سلام ياجرح الفراق اللي مضى له حول عام=كل عام وانت بخير ياجرحي وانا بمليون خير
وسلامتكم ........