السلام عليكم
اخترت لكم هذه القصيده لشاعره تلقب باسم (( همس العتب ))
بصراحه لم أقرأ لها من قبل ولم أسمع عنها وربما الكثير منكم لايعرفها
ولكن عن نفسي هذا ما أبحث عنه دوما الأسماء الغير معروفه بالساحه
ولأن ماقرأته لها طرح راقي يفوح بعطر أنثوي صارخ
أضعها بين أيديكم لتشاركوني هذه المتعه
.
.
.
.
يبادلني غلاي بنار هجر ٍ جمرها وقاد = كثر ما أعطيه حب يزيد في بعده ويجفاني
بمقياس الغلا صرنا أنا وصويحبي أضداد = تناسب بيننا عكسي.. ليا من جيت خلاني
أجيه وكلي أشواق وحنان ٍ مكتسيه وْداد = بقلب ٍ ذابت عروقه بعد ما طال حرماني
من اللهفة على شوفه أجيه أسابق الميعاد = تسابق خطوتي نبضة فؤادي ورعشة أجفاني
و أحاول بالكلام أرسم صور وأرسم لها أبعاد = وقبل أقولها تنطق عيوني وتسبق لساني
أسولف له عن الحب ويسولف عن فرس وشداد = يقول : الحرب كانت بين جدانك وجداني
و أقول أرجوك يا عمري شتاي بداخلي يزداد = أبي ليلة غلا تنعش حشاي و تدفي أركاني
أبي ساعة دفا .. ودين الوله له خافقي سداد = طلبتك يابعد عمري علشاني علشاني
أنا أترجاه ويكرر أنا لي لابة ٍ أسياد = غزوكم ثم سبوكم واسئلي فلان وفلنتاني
عساهم مانسوا جيش ٍ عليهم عادي ٍ منقاد = ويستطرد أنا لي لابة ٍ شجعان فرساني
واقول ونعم يا عمري تراكم كلكم قياد = قروم ٍ كلكم يا سيـّدي فرسان شجعاني
وركـّز نظرته فيني .. يناظر والعيون حداد = بعد تستهزئين بهرجتك تشنين عرباني ؟!
نسى إني بنت عمه و ألتقيه بخامس الأجداد = يبي يغضب علي بأي صيغه لو هو الجاني
سكتْ .. وهو سكت مثلي يحسب السالفة بعناد = وقال أنتي بديتي الهجر ... وقلبي منّك يعاني
تركني تنزف جروحي ولبـّسني طعون جداد = شكيت ونقـّض جروحي ولوّعني وبكـّاني
وسبقني يشتكي مني مثل ما هو على المعتاد = أجل لو كنت جارحته أنا وش كان سمـّاني؟!!
دمتم بود/