لاتحايد .. لاتحايـد .. ولـو هـي بالعنـاد
العنـاد ارحـم ولا الوقفـة المستنـكـرة
الف درب ٍ تستفـزك .. ولااظنـك جمـاد
والله ان بعـض الجمـاد يتخيّـر مكسـرة
والشجر إنسان .. لكنـه اوغـل بالحيـاد
قل معي : ملعون شخص ٍ تشبّه بشجـرة !
كيف عقب الطيش والعيش في جرح وضماد
يصبح اللي لا رموه بحجر طـش ثمـره !؟
عاد وان قلت: الشجر جاد قلنا: كيف جاد ؟!
دون أن يملك على منع جـوده مقـدرة !؟
من عجز عن بخل .. ما للكرم فيه امتداد !
مثل ما القدرة على الثار ساس المغفـرة !
يارفيقي واستمع لي .. وخذ علـم ٍ وكـاد
لايغـرك مايقولونـه اهــل البـربـرة !
انتهى الماضي وجينا مـع علـوم ٍ جـداد
تنتمـي للعقـل ماتنتـمـي للمقـبـرة !
الكرم .. لو كـان بـذل النفايـس للعبـاد
كان ما سـت الصبايـا تسمـى الجوهـرة
الكرم : أن ترخص الشمع في عز ّ السواد
الكرم : أن تمنع الدمع عـن وجنـة مـرة
والكريم : اللي عطى النوم لعيون السهـاد
والشجيع : اللي غفى ما تذكـر خنجـره !
والله ان اللي يحسـب الشجاعـة بالزنـاد
مثل من يحسب حلاة الحديـث الثرثـرة !!
وانت تدري قلة الهرج مـن كثـر الرشـاد
غير شِعري لو كثر .. بالرشاد استكثـره !
إيه شاعر واطلب الصفح عن ذنب المـداد
في بلاد ٍ ساوت الشعر باكـواز الـذرة !!
والله اني ما حرثت الورق وارجـي حصـاد
مير شفت الارض ترزح تحت ثقل صخـرة
واذكر اني شفت قلبـي وعشقـه بازديـاد
واذكر اني ليـن هالحيـن فكـري بعثـرة
لجل هـذا أكتـب الشعـر .. واذم الحيـاد
ولجل هذا قلـت هالشطـر ليتـك تذكـره
الشجر: انسـان .. لكنـه اوغـل بالحيـاد
قل معي : ملعون شخص ٍ تشبّه بشجـرة !
،،،،،،،،،،،