السلآمـ عليكمـ
أضع هذهـ المتوآضعه في متنآول مسآمعكمـ أنتقآدآتكمـ
وأتمنى تحوز على رضآكمـ
لا اله الا الإله الباقي العدل الســــــــلام=حامي البيت المبارك من حماقة ابــــرهه
يوم شن بجيشه الثاير على البيت الحرام=حملة كلن يضيع بكبرها وش كـــــــــبرها
من عناد وكبرياء ونار غيره وانــــــتقام=لكن الله فوقه اعلى من الجيوش وكثـرها
جاه شي لو درابه كان آمن واستــــقام=بس هاذي خطرفاته ويتحمــــــــل وزرها
كل مخطي يذكر الله قبل لايخطي شمام=ويعرف ان العمر صفحه والفعايل حبرها
ويتغسل عن ذنوبه ويترفع بالمـــــــــقام=ويتحاشى لو يضيع بوسط عينه صــغرها
في زمان فيه وهن وفيه ذله وإنهـــــزام=والفتن مثل الطيور اللي تناست وكـــرها
ولا يغادر هم قلبه غير من صلى وصام=وعاش عمره في مجالس عطرها من ذكرها
ومن تمسك في سهام الليل تخطيه السهام=يحفظ الله كل جبهة ماتناست وتـــــــرها
البشر قمة شموخه سجدة لرب الأنـــام=وسط ناس في زمنا جاهرت في كفــــــرها
ان طلبنا نطلب الله للصحيح وللسقام=ولانوسط وانتوسط في الحياه وامــــــــرها
نحمد الله في بلدنا لامزار ولا مقام=ولانتبرك عند ناس بالشه في عمـــــرها
انت ياسامع كلامي اترك اسباب الخصام=عن كلام مايفيدك صون نفسك وادرها
واليمين اللي تقودك للمــــــــذله والحرام=كان ماادبت نفسك مايفــــــــــــــيدك بترها
هيض جيوش السوالف شي وسط الراس حام=والسكارى مايغادر من عيوني سكــــــرها
إستثارتني وثارت داخلي مثل الغمام=وامطرت بي حرف حرف وذوقتني قطرها
ؤالسماء سوده وبين نجومها البيض ازدحام=كانها تعجبك قلي وش تقول فبـــــــدرها
البدر بين النجوم النور والباقي عتام=لاطلع في ليل نجمه تستحي من سمرها
ياكواعب يالواعب بأكثر عقول الفهام=مصدر السحر الحلال وسالفتنا سحـــــــرها
كل بنت نقول دره ياخي وش هذا الكلام=والله ان الدره اللي تجتهد في ستـــــــــرها
السواد احلى على قلبي من اشباه النعام=ومن تغطت بالظلام الله ينور قبــــرها
هيه ياللي تسترين الراس يابنت الحشام=يابعد كل الوجيه السافرات وسفــــرها
كل من شافك بعينه ذاق طعم الاحترام=واستحى يرفع عيونه لو تعود مـــكرها
في سوادك الف حصن ودونها فارس همام=يحرسك من شر نفس تشتكي من فقرها
فارسك دينك وخلقك في نهار الاحتدام=انتخي به لانوت بك كل عين غدرها
والله ليبطون وانتي بالسما بدر التمام=ولايطـــولك قول ناس ميته من قهرها
ويامخصر يامعطر وسط سوق به زحام=فيه تلعن كل بنت خايبه من عــطــــرها
لاتدور في عيون الخلق عن مدح وغرام=مايزيد البرتقاله لو تزين قشـــــــــــرها
ومن تبيع احلى المعاني لأجل ذيب ماينام=السهر مشقي عيونه دنيته يا صــغرها
لايغرك لو سمعتي منه معسول الكلام=من تقدر شخص واطي صار واطي قدرها
صوني العرض الشريف ولايحقق بك مرام=وإرفعي نفسك وعيشي دنيتك في طهرها
اسمعيني وافهميني واذكري يوم المــــــقام=يوم يندهك المنادي والبشر في حشرها
يوم غيرك في جنان كلها برد وسلام=وعوض الله كل بنت في نهاية صبرها
وانتي بدار عليها لعنة الله والأنام=وسط نار مايوصف بالقصايد حـــــرها
يوم ما لاينفعونك لاخوال ولاعمام=ولايفيد النفس لو هي تجتهد في عذرها
ياعسى الله يجتبينا من خطايانا الجسام=ويحفظ امتنا ويبقى دينها هو فخرها
القصيدة واكتبتها داخلي عوج العظام=ومن يحب الخير لازم يجتهد في نشرها
وسلآمتكمـ