نواصل رحلتنا مع سندباد الشعر عمر غربي
سرقة الافكار اعتقد انها اقوى بكثير وافظع من سرقة الاموال اعزائي كثيرا منكم قرأ ابداعات السندباد و" شطحاته
النشمية " هكذا كانت ردة فعله عندما سرقت مشاعره
واللي خلقنـي مـا تضايقـت "نـواف"
ولا تحسب اني بالسوالـف تأثـرت..!!
بعض السوالف ردهـا عندنا.."طـاف"
وبعض السوالف .."نسحب بوجهها كرت"
ماجيت ادور عندهم .. راي وانصـاف
والحمـد لله واثــقٍ مــا تكـبـرت
/
انا البحر..وارمي لهم بعض الاصداف
و مهما رميت لشاطئـي ماتخسـرت
واللي غدى لاصدافـي اليـوم لقـاف
قله بها اسمي منطبع وين ما طرت..!!
/
والمسأله ماهي ترى "حزب واحلاف".!!
انا علـى وضـح النقـا مـا تستـرت
يكفي احترامي للفكر و اعـذب القـاف
ويكفي دخلت بفكرهـم يـوم سطـرت
ماهمني "شهـرة" و لا "رزة غـلاف"
شفني رقدت..ولااكثر النـاس سهـرت
واليا انسرق فكري ترى ما من خـلاف
يا كثرهم قبلي..وانـا مـا تكـدرت.!!
يعني.. لك الله ما تضايقـت "نـواف"
ولا تحسب اني بالسوالـف تأثـرت..!!
أنا اللـي "صرقـع" الدنيـا..//.. وخربهـا ((بشطحاتـه))
وكثير اللي خذو نهجي..//..مشو في درب ((شطحاااتي))..!!
أنــا ماجـيـت للدنيا..//..مـجـرد "وده و هـاتــه"
أنـا جيـت اعلـن ابداعٍ..//..يقـرب لـي مسا..فاتـي..!
يسيل مـن القلـم "حبره"..//.."صريره"يفضـح "سكاتـه"
اخذ "حبره" مـن عروقي..//..جنونـه يفضـح "سكااتـي"
علـى سطـح الـورق ينزف..//..يعبـر عـن "معاناتـه"
يترجمهـا علـى أورااقي..//..خليـطٍ مـن "معاانااتـي".!
اشوف "سطورهـا" ترجف..//..قبـل تمطـر "عباراتـه"
ومـع أول "حرف"مـن نزفي..//..تلخبطهـا "عبااارااتـي
أجمل ما يربط العشاق .. هو شوقهم .. فعندما يتوقف أحساسك بالشوق لأي شخص تأكد بأن صفة الحب التي كانت تربطكم أنتهت ..
ولشاعرنا حديث جميل عن الشوق.. استمتعوا بهذه القصيدة
فز الخفوق وجيـت كلـي "اطامـر"
فـزة رضيـعٍ عنـد راسـه منبـه
ياحـي طيـفٍ تالـي الليـل عابـر
مر الخيال .. وللاسف ما نشـب بـه
ياطيف وقف!! قال (Sorry) مغـادر
و"أغرب" وعيني ودها تغتـرب بـه
ماكنت احسب الحب مذنـب وكافـر
إليـن ماشفـت القهـر فـي مغبـه
حبٍ "حشيم" وحب "ملعـون سافـر"
و"حبٍ" لو انـه فـي اياديـك كبـه!
يا انسـه!! تكفيـن لازلـت صابـر
والصبر ماهو "كيف" واقدر اصبـه!!
لا يابعـد امسـي ويومـي وباكـر
جيتك "يتيمٍ" به أجـر واكتسـب بـه
جيتك وانا "تلميـذ" ماهـو بشاطـر
ضمية تلميـذك!! عشـان ايتنبـه!!
واليا كسر خاطرك "ياحوّوول" عاثر!!
ضميه ضمـة طفـل بيديـن "ببـه"!
يصير الاول..بعـد ماكـان عاشـر
ويصبح مقر العلـم وايضـا مطبـه
والله لو حبك "سهم" وانـت "تاجـر"
ان كان خلق الله تجي "تكتتـب بـه"
وانا اشهد اني بينهم ..بـس خاسـر!!
دام "المؤشـر" مايبـي نقتـرب بـه
ماعـاد ينفـع هالسهـر والمساهـر
طاحت عيوني والسهر يكتـرب بـه
واصبحت مكسورٍ..وانا كنت كاسـر
والموووت جيته ليـن اخـر مصبـه
هذي عيوني شوفهـا .. والمحاجـر
تشكـي غيابـك ياهـواي وتسـبـه
وان كان تنشد وش بلا الوجه غابر؟؟
مابين "خدينـك" علاااجـه وطبـه!!
كلمتنـي مـن بعيـد..//.. وقالـت الدكـتـور ويـنـه
قلت انا الدكتور يالله ..//.. وشتبيـن افحـص واشـوف
قالـت :اسمـع ياطبيبـي ..//.. قلبـي عذبنـي حنينـه
ودايمـا يـزداد حـده ..//.. باختـلافـات الـظـروف
واشعـر بشـي غريـب..//.. كـن قلبـي جارحيـنـه
باقوى من طعن الخناجر ..//.. واقوى من ضرب السيوف
قلت :انا والليل مدري..//.. انتـي عمـرك تسهرينـه؟؟
قالت اسهر طول ليلي..//.. لا هو جوع ولا هو خـوف!!
قلـت: طيـب والقصايـد ..//.. الشعـر ماتنظمينـه؟؟
قالت :اكتب طـول ليلـي..//.. واتلاعـب بالحـروف!
قلت باللحظه هذيـك ..//.. احيـان دمعـك تذرفينـه؟؟
قالت :إلا يروح دمعـي..//.. بيـن منديـل وكفـوف!!
قلت : مالك من علاج ..//.. وقالت الا الطـب وينـه؟؟
ماقدر يلقـى علاجـي..//.. وقـادر ينسـخ خـروف!!
قلت: "عنتر" ماجهلتـي..//.. و"قيـس" اظنـك تعرفينـه
وش ذبحهم في زمنهم؟ ..//.. قالـت الحـب العسـوف!!
قلـت :هـذا انتـي عرفتـي..//.. الهـوا ماتجهليـنـه
كم يبهذل في رجـال..//.. وكـم يغربـل فـي هنـوف
قالت: وربي صدقـت ..//.. وكنـت احـس ومستهينـه
لين ماربـي بلانـي..//.. بحـب مـا مثلـه وصـوف
وصكت الهاتف وباقـي..//.. صوتهـا باذنـي رنينـه
واهني من هو عشقهـا..//.. اشهـد ان حظـه يحـوف
الكثير من الشعار كتبوا عن السياسية وتخاذل العرب ولكن .... !! سأدعه يخبركم عن هذا الموضوع الذي لم يتطرق له من هذا الكم الهائل من الشعار من أبناء جيله وسابقيه
عربنا ياصباح الخـوف..//.. صبـاح الـذل والدمعـه
صباح "بريمر" و"باول" ..//.. و"بوش" ودمعة عراقي!!
صباح ابطال فلوجـه..//.. صبـاح علـوج مجتمعـه
صباح الموت واهلا به ..//.. اذا عبـر عـن اخلاقـي
صباح اللي نسـى قدسـه..//.. ولا باقـي لهـا سمعـه
صباح "اشجب واستنكر..//.. وارفض" لآخـر اعماقـي
صباح اللـي ينادينـا ..//.. ولكـن مـا احـدٍ سمعـه
"لارَى .. لا اسمع..ولا اتكلم"...//.. . ولكن خلها ارزاقي
صباح السلم مدري حلـم ..//.. مـدري نـاس منقمعـه
صباح "الخارطه" ظلما..//.. و"طريقٍ" مابـه اشراقـي
صباح قلوبنـا شتـى..//.. صبـاح الزيـت والشمعـه
ولولا زيتنا اصـلا!!!..//.. ولا باقـي لنـا باقـي!!!!
صباح بريهة الجنـدي..//.. وصرنـا للعجـم طمعـه
صباح البشت واحلـى بسـت..//.. تحياتـي واشواقـي
صباح البنطلـون ازرق..//.. وكـوتٍ ظاهـره لمعـه
صبـاح ال"هـاي" يامستر..و"دانـه.. دان" وافراقـي!!
صباح ارهابي صغيّر..//.. رماهـا واخطـت الرمعـه
غبي يحسب كلامه صح ..//.. وهـو للصـح مشتاقـي
صباح الخير مامـن خيـر..//.. وحنـا سبتنـا جمعـه
صباح المهزلـه والـذل..//.. ولويـة روس واعناقـي
عربنا ياصباح الخـوف..//.. صبـاح الـذل والدمعـه
صباح "بريمر" و"باول"..//.. و"بوش" ودمعة عراقـي!!
ولشاعرنا حديث جميل عن النوم والنعاس ..
يا "نوم" تكفى بسألك..//..لاجيتهـا بإيـدك "نعـاس"
وشلون تقدر لل"نعاس"..//..اللي برمش عيونهـا..!!
تقدر تقاوم شدته ؟؟ ..//..والا تجـي لـه بانعكـاس
والا تموت من الظما ..//..على ضفـاف جفونهـا!!
اللي اعرف ان "السهر"..//.. قبلك وهو صعب المراس
حاول يداعب جفنها..//..لكـن عجـز مـن دونهـا!!
الفاتنة فـي قدها..//..مـن راسهـا حتـى المـداس
في طولها..في قولهـا.. فـي شكلهـا ..فـي لونهـا!
والله ما ألومك يا "متر"..//..تذوب عند اخـذ المقـاس
تقمز من"الملّي"..."شبر"..//..وتضيـع عنـد متونهـا
هذيك لامن جت هنا!!..//..الـدم يوقـف باحتبـاس
ترقـى بعالـي اضلـعـي..//..والأوردة يتلونـهـا
هذيـك لا قالت:هلا..//..ابـدا صعـودٍ بانتـكـاس
كنْها تغني فـي (هـلا) ..//..اضيـع عنـد لحونهـا
جيت اتسابـق يمها..//..أنـا وقلبـي فـي حمـاس
من اللي يسبق صاحبه..//..يحصل على مضمونهـا!!
"قلبي" مقابل "عشقها"..//..اليـا بغـت راسٍ ب..راس
واكتـب علـى قلبـي فدا..//..مدامنـي مجنونـهـا
و يا "نوم" تكفى بسألك..//..لاجيتها بإيـدك "نعـاس"
وشلون تقدر لل"نعاس"..//..اللي برمش عيونهـا..!!
حسبي الله عليك شلون تقوى المنـام
وانت تدري حبيبك يحتري لك خبر
اشهد انه على الدنيا بعـدك السـلام
واشهد انه بصدك قد ذبحتي ((عمر))
/
\
آه ياحظ منهـو لا بغـى النوم..نـام
لا ارتخى رمش عينه مادرى بالسهر
ماهو بمثل حالي من يحـل الظـلام
يكرب الرمش نفسه باتجـاه الشعـر
كن بيني وبين النوم غـل و خصـام
ما انتصالح ونرضى غير عقب الفجر
بلغو مـن تسبـب بالتعـب والهيـام
بان حالي بعدهـا والله انـه خطـر
جعلي فدوة عيونه...أو علي الحـرام
فدوته من رموشه لين اصغر ظفـر
/
\
وكـان "مـت" بسببهـا بلغوهـا السـلام
وكفنوني ب(سلوى)..وادفنوني ب(قطر).!!
مازلنا نبحر مع ابداع السندباد
مدامه ضايقٍ صدرك..//.. لك الله صدري الملعب
تعالي خوذي ضلوعي..//.. امانه والعبي (حجله)
ابحني هالمحاني لك..//.. واذا جسمك بدا يتعـب
لك الله اشربي دمي..//.. لعينك ينقلـب "دجلـه"
تصدق! قالت: ضلوعي..//.. حبيبك لو بدا يلعب
تناظر له شرايينك!!..//.. وتلطم ماحـلا حجلـه
ابعلنها.." يشرفني..//.. ويسعدني..هلا.. مرحب"
بمن هو زار احشائي..//..هلا من راسه,, لرجلـه
على كيفك..على هونك..//..بخطواتك هنا..اقرب
فداك عيوني..وروحي..//..وقلبٍ في يدك أجلـه
/
\
أبي ترقد وسط قلبي..//..ولـو قلبـي نـوا يضـرب!
وعد.. لاكتم لك النبضة !!..//.. لاجل مايزعجك وجله!!
وأبي اكتم لك انفاسي..//.. اخـاف اصواتهـا ترعـب!
أبي تاخذ ولو غفـوة!..//.. بعـد عينـي علـى عجلـه
أبـي لاضاقـت دروبك...تعـال وقلـبـي المـهـرب
وانا لاضاقـت دروبـي..//.. لجـأت لعينـك الخجلـه
/
\
أنا حالي ,,بعد حالي..//.. اذا صوتك بدا يغـرب
مثل عودٍ,, خسر ماله,,فقـد ربعه,,فقـد نجلـه!!
حبيبي كل ماضاقت..//.. تعال وصدري الملعـب
أمااانه تاخذ ضلوعي..//.. وتلعب فيهن (الحجله)!!
ياعـاذل طـفـى بـدربـي سـراجـه
الدرب واضـح لـو غـدى فيـه تعتيـم
عذرك "مطرها" وزلتك هـي "عجاجـه"
وننسى "العجاجه" لا لفـى بعدهـا ديـم
لاشك بعض الجـرح يصعـب علاجـه
مثل الوشم يرحل معـك وايضـا يقيـم
ولاجلـي ادور راحـتـي وابتهـاجـه
البـاب اصكـه لا غـدى منـه تنسيـم
هرج سميـن // وهـرج كلـه سماجـه
آخذ سمين الهـرج// مـن دون ترهيـم
شربـت مـن حلـو الزمـان وهماجـه
واخـذت مـن طعنـات الايـام تعليـم
مـا همنـي بالفيـل كـم سيـم عاجـه
ولاهمني هالفيل هـو كـم بعـد سيـم!
وعرفت وش تعني مـع الوقت"حاجـه"
ورسمت لقلوب البشـر خـوش ترسيـم
((قلب)) حديد و((قلب)) كنـه زجاجـه
و((قلب)) مع الأيام يحتـاج ترميـم!!
ولي ((قلب)) جامـد باللقـا والمواجـه
لاشك هـو يعشـق بعـد وايضـا يهيـم
وماهزنـي ياعاذلـي كــود حـاجـه
,,,,دمعة كبير السن,,,, لا حده الضيم!!!!
خيال شاعرنا يأتي بكل ماهو جميل .. ومن ابداعاته هذه القصيده الجميله
اصعدي فوق الضلـوع..//.. وداخـل القلـب انزلـي
واكتبـي داخـل فـؤادي..//.. "ابتـدا عشـقٍ جنـون"
وفـي شرايينـي ونبضـي ..//.. حاولـي واتغلغلـي
واسكني في وسط دمـي..//.. لعنبـو جـده سكـوون
وان ذبحـك البـرد فينـي..//.. بالمحانـي اشعـلـي
وقتها حتـى ضلوعـي..//.. لنـار حبـك يحتـرون
شفتي جموع الروافض..//.. يـوم تلطـم يـا "علـي"
ربع حبـي لـك,, وربـي..//.. كلبوهـم مايجـووون
وشفتـي شلـون الثريـا..//.. فـي سمانـا تعتـلـي
نجم حبك فـي سمايـه..//.. ساطـعٍ شـوف العيـون
مـا علـي مـن ينتقدنـي..//.. لـو نقدنـي ماعلـي
دام حبـك منكتـب لـي..//.. ينـقـدون ويقـعـدون
وان بغيتـي مـن قصيـدي ..//.. آمرينـي وازهلـي
والله لعينـك لاخلـي..//.. هالقـوافـي يرقـصـون
دام جمهوري عيونـك..//.. صـار هالمسـرح ملـي
ألقـي انـواع القصايـد..//.. والرمـوش يصفـقـون
وكني اسمع من رموشك ..//.. "يالا لا ..له..يالا ..لي "
ورمـشٍ يقول:لخويـه ..//.. "ياخويـي جـاهـزون"
ارسلـي سهـم المنايـا ..//.. مـن عيونـك ارسلـي
لخبطـي دفتـر قصيـدي..//.. واقطعـي هالمقرفـون
وان سمعتي انـي قتيلـك..//.. طالبـك لاتـول ولـي
بس قولي هو"سبقنـا"..//.. وحنـا بعـده "لاحقـون"!
وهنا أحبتي.. ألوح لكم بهذه القصيده.. معلنة عن إنتهاء هذه الرحلة مع سندباد الشعر على أمل أن ألتقي بكم في رحلة أخرى مع شاعر آخر
افزعي لي يا الحـروف الابجديـه
واحضري حرفٍٍ جديدٍ ما انكتب به
با..اتوجد واختمك يالقاف ب.."إيّه"
ياوجـودي وجـد ذبـاحٍ خـويـه
مايبيها ميـر هـو فيـه ام..تشبـه
وطالبـوه عيـال عمـه والحميـه
وكل من حولـه لفـى يمـه طلبـه
وراح روحـه ماوراهـا اي جيـه
ناصي الغربـه ودارٍ يغتبـرب بـه
ماترك خلفـه سـوى أمـه وخيـه
وعودٍ .. السكّر .. مع ايامه لعب به
وان غشـاه الليـل دنّـى الشاذليـه
وارسل الدمعـه ودعـواتٍ لربـه
اشهد اني بحالتـي اصبحـت زيـه
في غياب اللي رماني وسـط حبـه
ومن يلوم اللـي تولـع فـي بنيـه
عمرها عشرين عـامٍ ينحسـب بـه
ان تهادت .."زولهـا" يذبـح بغيـه
"زول" طفلٍ .. لاتهادى ايقول "ببّـه"
لا استعدت ..زول من يضرب تحيه
ولا استراحت..راحت الخلق بمغبه
اشتريها بألف طعنـه والـف كيـه
واحـرق بقلبـي علشانـه واشبـه
جيتها (عفو) ولفتني ب(الخطيـه)!!
وكل (ذنـبٍ) وصلهـا لازم يجبـه
راحت وخلت بإيدينـي هالوصيـه
(خذ قليل الشي دام انـك تحبـه!!)
كنهـا حلـمٍ مسكنـي مـع يـديـه
جيت اضمه.. قال: أنا آسف مشبه!!
وجاوبينـي يالحـروف الابجـديـه
هو بقى عندك جديدٍ ينكتب بـه !!!